ءبىز جاساعان كونۆەرتەر ارقىلى «اباي جولى» 3 سەكۋندتا جاڭا ءالىپبي جۇيەسىنە اۋدارىلادى - ءبىلال قۋانىش
بۇگىن ماجىلىستە ءوتىپ جاتقان «مەملەكەتتىك ءتىلدىڭ لاتىن گرافيكاسىنداعى ءالىپبيىنىڭ ءبىرىڭعاي ستاندارتىن ەنگىزۋ ماسەلەلەرى تۋرالى» پارلامەنتتىك تىڭداۋ كەزىندە احمەت بايتۇرسىن ۇلى اتىنداعى ءتىل ءبىلىمى ينستيتۋتىنىڭ ديرەكتورى ەردەن قاجىبەك وسىلاي دەدى، دەپ حابارلايدى قازاقپارات.
ءبىلال قۋانىش ءوز سوزىندە وسى كونۆەرتەردىڭ ارتىقشىلىقتارىنا توقتالا كەتتى: «ءبىرىنشىسى، ءبىزدىڭ ماماندارىمىز ون جىلدان بەرى زەرتتەپ كەلە جاتقان قازاق الىپبيلەرىنىڭ كونۆەرتەر جۇيەسى وسى كۇنگە دەيىن الەم قازاقتارى پايدالانىپ كەلە جاتقان كيريلل، لاتىن، توتە جازۋلاردى ءبىر-بىرىنە قاتەلىكسىز اۋدارا الاتىن بىرەگەي جۇيە. بۇل جۇيە وسىعان دەيىن «ەگەمەن قازاقستان»، «قازاقپارات» اگەنتتىكتەرىندە قولدانىلىپ، باسقا ەلدەردەگى وتانداستارىمىز پايدالاندى. سونداي-اق، توتە جازۋمەن وقيتىن قىتاي قازاقتارى دا، لاتىن الىپبيىمەن وقيتىن ەۋروپا قازاقتارى دا وسى كونۆەرتەر ارقىلى جاڭا الىپبيدەگى مالىمەتتى وقي الادى».
ودان بولەك، سپيكەردىڭ سوزىنشە كوپجىلدىق تاجىريبەدەن وتكەن وسى كونۆەرتەر جۇيەسى ەندىگى كەزەكتە مەملەكەتتىك ءتىلدىڭ ءبىرىڭعاي ستاندارتتى ءالىپبيىن حالىق اراسىندا وتە ىڭعايلى، قولجەتىمدى تۇرعىدا ناسيحاتتاپ، تەز قولدانىسقا ەنۋىنە ايرىقشا قىزمەت ەتپەك.
«مىسالى ءسىز كيريلل الىپبيىمەن وقىعان ادام بولساڭىز، «Attila group» كومپانياسى جاساعان كونۆەرتەر جۇيەسىن كومپيۋتەرىڭىزگە نەمەسە ۇيالى تەلەفونىڭىزعا ورناتۋ ارقىلى كەز كەلگەن ۋاقىتتا كەز كەلگەن ءماتىندى جاڭا ءالىپبي نۇسقاسىنا اۋدارا الاسىز. ءتىپتى «اباي جولى» رومانىن 3 سەكۋند ارالىقتا جاڭا ءالىپبي جۇيەسىمەن وقۋعا مۇمكىندىگىڭىز بولادى. بۇل كونۆەرتەردى كەز كەلگەن كومپيۋتەرگە، ۇيالى تەلەفوننىڭ كەز كەلگەن نۇسقاسىنا، كەز كەلگەن پروگراممالىق قۇرالداردا پايدالانۋعا مۇمكىندىك بار»، - دەدى ول.
ەسكەرەتىن ءبىر جايت، مەملەكەتتىك ءتىلدىڭ لاتىن گرافيكاسىنداعى ءبىرىڭعاي ستاندارتتى ءالىپبيى حالىققا تانىستىرىلعان سوڭ «كونۆەرتەر جۇيەسى» مەملەكەت بەلگىلەگەن ءبىر عانا نۇسقامەن جاسالاتىن بولادى.
