رەسەيلىك مەيمان ەكسپونىڭ 3 ميلليونىنشى كەلۋشىسى اتاندى - كەسكىن
«ەكسپو-2017» كورمەسىنىڭ باستى وپەراتسيالىق ورتالىعىنىڭ قىزمەتكەرلەرى كورمەنىڭ 4 كىرۋ ەسىگىن قاداعالاپ وتىر. كوپشىلىك باقىلاپ وتىرعان جاڭالىقتى جارتى ساعات ۋاقىت كۇتۋگە تۋرا كەلگەن. اقىرى بيلەتتىڭ سوڭعى 4 ءنومىرى ارقىلى كورمە قىزمەتكەرلەرى 3 ميلليونىنشى كەلۋشىنىڭ كىم ەكەنىن انىقتادى. ول كورمەنىڭ ورىنبور كوشەسى جاعىندا ورنالاسقان ەسىكتەن كىردى.
الەمدىك دارەجەدەگى حالىقارالىق كورمەنىڭ 3 ميلليونىنشى كەلۋشىسى بولۋ باقىتى رەسەي ازاماتى يۋري شۋرىگينگە بۇيىرعان ەكەن. مەيمان ماسكەۋدەن «ەۋرازيا اپتاسى» شاراسىنا ارنايى كەلگەن.
«مۇنداي ساتتىلىكتى كۇتكەن جوقپىن، البەتتە. كۇنى كەشە عانا «ەكسپو-2017» حالىقارالىق كورمەسىنە كىرىپ، قازاقستاننىڭ پاۆيلونىن ارالاعان بولاتىنمىن. ءبىراق ول جولى رەسەيدىڭ پاۆيلونىن تاماشالاپ ۇلگەرە الماي كەتتىم. وسى سەبەپتى كورمەگە قايتا كەلگەن بەتىم. مەن قازاقستانعا وسىمەن ءتورتىنشى رەت كەلىپ وتىرمىن. ماعان قازاقتىڭ ۇلتتىق تاعامدارى وتە ۇنايدى»، - دەيدى كورمەنىڭ 3 ميلليونىنشى كەلۋشىسى.
جولى بولعان مەيماندى ەكسپو باسشىسى احمەتجان ەسىموۆ قۇتتىقتاپ، كورمەنىڭ سيمۆولى مەن پلانشەتتى سىيعا تارتتى.
ەسكە سالا كەتسەك، حالىقارالىق كورمەگە 2 ميلليونىنشى كەلۋشى 4 -تامىزدا كەلگەن بولاتىن. ورال قالاسىنىڭ عايسا جۇماليەۆ اتتى كاسىپكەرى كورمەنىڭ 2 ميلليونىنشى مەيمانى اتانىپ، ونى «استانا ەكسپو-2017» ۇلتتىق كومپانياسىنىڭ باسقارما ءتوراعاسى احمەتجان ەسىموۆ قۇتتىقتاعان ەدى. مارتەبەلى مەيمانعا پلانشەت، قۇلاققاپ پەن كورمەگە ليميتسىز بيلەت سىيعا تارتىلعان بولاتىن.
