مۇقاعالي ماقاتايەۆتىڭ 3 ولەڭى
«ەي، بەزىلدەكتەر، سەندەر ەمەسسىڭدەر ماعان باعا بەرەتىن! ناعىز باعالاۋشىلار ءالى الدا. جىلدار وتەدى، جاڭا ۇرپاقتار كەلەدى، ءبىزدىڭ ءارقايسىمىزدى ءوز ورنىمىزعا سولار قويادى. ەجەلدەن سولاي بولىپ كەلگەن، سولاي بولادى، بولا بەرەدى دە. مەن ءوزىم جايىندا مىنانى ايتام: مەن جيىرما ءبىرىنشى عاسىر ۇرپاقتارىنىڭ قۇرداسىمىن. بالكىم، ودان ارىدەگى ۇرپاقتاردىڭ تۋىسىمىن دا...» ، - دەپتى مۇقاعالي. اقيىق اقىن ءوز زامانىندا لايىقتى باعاسىن الماسا دا، بۇگىنگى ۇرپاق ونى ءبىر عاسىردا ءبىر تۋاتىن الىپ تۇلعا رەتىندە تانيدى. ەندەشە الىپ اقىننىڭ جۇرەكتەن- جۇرەككە جەتكەن ءۇش ولەڭىن نازارلارىڭىزعا ۇسىنامىز.
تۋعان جەرگە
تانىس ولكە، تانىس ايماق، تانىس ماڭ:
اناۋ جەردە - قۇربىلارمەن الىسقام،
اناۋ جەردە - قۇربى جانمەن تابىسقام.
البا- جۇلبا اقشا بۇلتتار جارىسقان،
تاۋلار انە، ۇيىقتاپ كەتكەن دانىشپان،
جولدار اناۋ، شۇباتىلىپ شاڭى ۇشقان،
تانىس ولكە، تانىس ايماق، تانىس ماڭ.
شابىندىقتار، ەگىستىكتەر، توعايلار.
توبەلەردىڭ توبەسىندە - كوك ايدار.
اق ساعىممەن ارالاسىپ، اۋلاققا،
ساعىم بولىپ بارا جاتىر كوپ ويلار.
ءبىر تىنبايدى شەگىرتكەنىڭ شىرىلى،
جەل قوزعاعان اق شيلەردىڭ سىبىرى،
ءبارى تانىس - كىسىنەگەن قۇلىنى،
ءىن اۋزىندا شاڭقىلداعان سۋىرى.
اينالايىن! اتامەكەن، اق مەكەن!
قانداي قازاق ىزدەپ سەنى تاپتى ەكەن؟ !
تۋعان ولكە ءتاتتى ەكەن عوي، ءتاتتى ەكەن!
ايتاتىن ساعان سىرىم
بۇل ايتاتىن ساعان سىرىم بۇل،
ەرتەڭىم مەنىڭ بۇلىڭعىر.
السىرەپ، دىمىم قۇرىپ ءجۇر.
اداسىپ مەنەن كەتكەن بە؟
اينالايىن قۇلىن- جىر.
ايتاتىن ساعان سىرىم بۇل،
باستاۋدىڭ مۇزداي سۋىمەن
مەرت بولا كەتسەم جۋىندىر.
ورتەنگەن جاندى سۋىندىر.
ەرتە كەلىپ، ەرتە ءولىپ،
شارامدى تاۋسىپ، توڭكەرىپ،
كەتەم بە دەپ قورقامىن،
ءوز وتىما ورتەنىپ.
بۇلاقتىڭ مۇزداي سۋىمەن
جۋىندىر مەنى، جۋىندىر.
قاۋىشىپ جانىم جىرىممەن،
الايىن سوسىن تىنىم ءبىر.. .
حالقىم باردا
شىنىمەنەن دوس جوق- اۋ دوس جوق مەندە.
سوندا قالاي، ءومىرىم بوسقا وتكەن بە؟ !
وسىلاي ءبىر بايلامعا كەلدىم بۇگىن،
قارادىم دا سۇيىسكەن قوس كەپتەرگە.
مەندە ارامدىق جوق ەدى الابوتەن،
دوسسىز ءومىر جالعاندا قاراڭ ەكەن.
قاق جارىلعان قاۋىمعا قايران جۇرەك،
قاشان عانا قاڭىراپ قالار ەكەن؟ !
ءسال سابىر ەت، ەي دوسىم، جاسىماعىن،
دوسسىزبىن دەپ مەن نەگە اشىنامىن؟ !
دوس كەپ مەندە، قاشاننان دوسىم - حالقىم،
قارايمىن دا مەن سوعان باسىلامىن.
دوسسىزبىن دەپ ايتا المان حالقىم باردا،
ساياسىندا حالقىم بار سالقىنداۋعا.
قارعاماسا بولعانى حالقىم مەنى،
اينالماسا بولعانى نارقىم داۋعا.. .
قالت- قۇلت ەتىپ، مەيلى، مەن كۇن كەشەيىن،
كۇن كەشەيىن، ەلىممەن بىرگە وسەيىن.
مەنى ازىرگە، ەي، تاعدىر، مازالاما؟
ەمىن- ەركىن جۇرتىممەن تىلدەسەيىن!
Massaget.kz