شىمكەنتتەگى كىلەم فابريكاسى 3 ميلليون شارشى مەتر كىلەم توقىدى
بۇگىندە كومپانيا ونىمدەرىن رەسەي، قىرعىستان، تاجىكستان مەن ازەربايجان سىندى ەلدەرگە ساۋدالاۋدا، دەپ حابارلايدى قازاقپارات ح ا ا ءتىلشىسى.
«وڭتۇستىك» ارنايى ەكونوميكالىق ايماعىندا ورنالاسقان كىلەم فابريكاسى قازاقستاندىق كاسىپكەرلەر مەن كىلەم شىعاراتىن«Kartal Carpets» اتتى تۇرىك كومپانياسىمەن بىرىگىپ 2013 -جىلدىڭ قازان ايىندا ىسكە قوسىلعان. بۇگىندە 240 ادام جۇمىس ىستەيتىن فابريكانىڭ جىلىنا 5 ميلليون شارشى مەتر كىلەم توقىپ، 4 مىڭ توننا پوليپروپيلەندى كىلەم تۇگى ءجىبىن شىعارۋعا مۇمكىندىگى بار. باستاپقىدا 1,7 ميلليارد تەڭگە كولەمىندە ينۆەستيتسيا سالىنعان ءوندىرىس ورنى وتكەن جىلى 3 ميلليون شارشى مەتر كىلەم توقىعان. مۇندا وندىرىستىك قۋاتى تاۋلىگىنە 9 مىڭ شارشى مەترگە دەيىن كىلەم توقيتىن «Van De Wiele» فيرماسىنىڭ 7 ستانوگى مەن پوليپروپيلەن جىپتەرىن يىرەتىن فرانسيا، گەرمانيا ەلدەرىنىڭ زاماناۋي قۇرال- جابدىقتارى ورناتىلعان.
ايتا كەتەيىك، كىلەمدەر سينتەتيكالىق پروپيلەن جىپتەرىنەن دايىندالادى. پوليپروپيلەن ءجىبى الەمدە قولدانىسى ەڭ كوپ تارالعان ماتەريال بولىپ تابىلادى. ول ءجىپتىڭ ەرەكشە قاسيەتتەرىنىڭ ءبىرى - شيراتىلمايتىندىعى. ياعني، يىرىلمەگەن ءجىپ كىلەم توقۋداعى شىعىندى مۇمكىندىگىنشە ازايتادى. سونىڭ ارقاسىندا، كىلەم شىعارۋدىڭ جۇمىسىن جەڭىلدەتەدى.
بۇگىندە اتالمىش كاسىپورىندا «بال تەكستيل» برەندىمەن مىڭ ءتۇرلى كىلەم توقىلىپ، «BCF», «Heat-Set», «Frize» ماركالى پوليپروپيلەن جىپتەرى يىرىلەدى. ناتيجەسىندە، وندىرىلگەن ونىمدەردىڭ جوعارى ساپاسى مەن ءتيىمدى باعاسى، الۋان ءتۇرلى ديزايندىق ۇلگى توپتامالارىنىڭ ارقاسىندا فابريكا ۇجىمى 2014 -جىلى رەسپۋبليكالىق «التىن ساپا» كونكۋرسىندا «حالىق تۇتىناتىن ەڭ ۇزدىك تاۋار اتالىمى» بويىنشا ەكىنشى دارەجەلى ديپلوممەن ماراپاتتالدى. ال 2016 -جىلى جەنيەۆادا وتكەن حالىقارالىق BID ساپا كونكۋرسىندا «GOLD» نوميناتسياسىنىڭ يەگەرى اتاندى.
اۆتور: اينۇر اقبايەۆا
