ديماش بايقاۋدىڭ 3-كەزەڭىندە قانداي ءان ورىندايتىنىن ايتتى
ديماش ينستاگرامداعى ءوزىنىڭ پاراقشاسىنا: «الدا دايىندىق. اقپاننىڭ 4- جۇلدىزى - كەلەسى بايقاۋ كۇنىندە اتاقتى #Queen توبىنىڭ رەپەرتۋارىنان «Show most go on» ءانىن شىرقايمىن! شوۋ باستالدى!»، - دەپ جازدى.
ەسكە سالايىق، وسى كۇندەرى قىتايدىڭ Hunan TV باستى ويىن- ساۋىق تەلەارناسىندا «I am a Singer-2017» مۋزىكالىق شوۋى وتۋدە. وندا باعىن سىناپ جاتقان ديماش قۇدايبەرگەنوۆ ءبىرىنشى كەزەڭدە ەڭ قيىن اندەردىڭ ءبىرى «SOS d'un terrien en détresse» كومپوزيتسياسىن، 28 - قاڭتار كۇنى وتكەن ەكىنشى كەزەڭىندە رەسەيلىك ۆيتاستىڭ «وپەرا №2» ءانىن ورىنداپ، قوس سايىستا جەڭىسكە جەتتى. ميللياردتاعان حالقى بار ەلدى داۋسىمەن تامساندىرعان ديماشتىڭ بۇگىندە تانىمالدىلىعى ارتىپ، ول قىتاي كوشەلەرىندە ءتىپتى، كۇزەتپەن جۇرۋگە ءماجبۇر.
ديماش 29 - قاڭتار كۇنى 28- دۇنيەجۇزىلىك قىسقى ۋنيۆەرسيادا ويىندارىنىڭ اشىلۋ سالتاناتىندا ونەر كورسەتۋ ءۇشىن الماتىعا كەلگەن ەدى. بۇگىن قىتايعا، ءارى قاراي چاڭشا قالاسىنا جول تارتتى.
وتانداسىمىز بۇعان دەيىن تالاي بايقاۋلاردىڭ، سونىڭ ىشىندە «سلاۆيان بازارى-2015» حالىقارالىق ءان دوداسىنىڭ جەڭىمپازى بولعان ەدى.
اۆتور: ايجان سەرىكجان قىزى
