شىمكەنتتە قۇنى 3 ميلليون تەڭگەلىك ەر- توقىم ساتىلىمعا شىعارىلدى

استانا. قازاقپارات - «كورمە» كەشەنىندە قولدانبالى ونەر كورمەسى وتۋدە، وعان وبلىستىڭ ءتۇرلى اۋداندارىنان قىرىققا جۋىق شەبەر كەلدى.

مۇندا حالىق اسپاپتارى، ۇلتتىق كيىم، قولونەر ەكسپوناتتارى قويىلعان، دەپ حابارلادى otyrar.kz.

اسىرەسە، قولدان جاسالعان ەر- توقىم جۇرتشىلىقتىڭ قىزىعۋشىلىعىن تۋدىردى. بىرەۋلەر اسىل تاستارمەن بەزەندىرىلگەن قىمبات بۇيىمدى ۇستاپ كورگىسى كەلسە، بىرەۋلەر ساتىپ العىسى كەلەدى. ءبىراق، كوپشىلىگىن بۇيىمنىڭ باعاسى تاڭ قالدىردى: ءوز تۋىندىسىن شەبەر ءۇش ميلليون تەڭگەگە باعالاعان.

امانعالي مومبەكوۆ ەر- توقىمدى ءۇش اي بويى جاساعانىن ايتتى. ول قىمبات تەرىدەن جاسالعان، قولمەن كەستەلەنگەن جانە اسىل تاستارمەن بەزەندىرىلگەن.

قولدان جاسالعان ەكىجۇزدى قانجار دا ەرلەر قاۋىمىنىڭ ىقىلاسىن ارتتىردى. قارۋ بولاتتان جاسالعان، ال اعاش سابى اسىل تاستارمەن كومكەرىلگەن. قانجار قۇنى شامامەن 1,5 ميلليون تەڭگە بولۋى مۇمكىن. كورمەدە سۋرەتشىلەر شىعارمالارىن دا ساتىپ الۋعا بولادى.