ەلىمىزدە 3 -قازاننان باستاپ تۇماۋعا قارسى ەكپە جۇمىستارى باستالادى
قازاقستاندا جىل سايىن جەدەل رەسپيراتورلىق اۋرۋلار مەن تۇماۋعا قاتىستى 1 ميلليونعا دەيىن جاعداي تىركەلەدى. بۇل - حالىقتىڭ 10 پايىزى.
بيىل رەسەيدەن جاڭا ۆاكسينا الىنعان. رەسپۋبليكا بويىنشا ۆاكتسيناتسيالاۋعا بارلىعى 1 ميلليون 300 مىڭ ادام جاتادى، بۇل ساناتتىڭ 99 مىڭى جۇكتى ايەلدەر مەن سوزىلمالى اۋرۋى بار ازاماتتار. سونىمەن قاتار ءجيى اۋىراتىن 500 مىڭ بالا مەن مەديتسينالىق قىزمەتكەرلەر جاتادى. ءدال وسى وسال توپتى قامتۋ ءۇشىن مەملەكەتتىك بيۋججەتتەن 1 ميلليارد تەڭگە بولىنگەن. قالعاندارى ءۇشىن ەكپە اقىلى.
«ۆاكسينانىڭ جاڭا ءتۇرى قولدانىلادى، ۆيرۋستىڭ ا تيپىندە گونكونگ، ال ب تۇرىنە بريسبەن شتاممى. تۇماۋدىڭ جاڭا ءتۇرى پايدا بولسا، كەلەسى ماۋسىمعا وعان توتەپ بەرە الاتىن نۇسقاسىنا تاپسىرىس بەرۋ ءۇشىن، ءبىز ۇنەمى مونيتورينگ جۇرگىزىپ وتىرامىز. مىسالى، بىلتىر الماتى وبلىسىندا 2 ، اقمولا وبلىسىندا 1 وقيعانىڭ سوڭى ولىممەن اياقتالعان. انىقتالا كەلگەندە، بۇل وڭىرلەردە ۆاكتسيناتسيالاۋدىڭ كورسەتكىشى تومەن بولعان»، - دەيدى ق ر باس سانيتارلىق دارىگەرى جانداربەك بەكشين.
بۇگىندە ۆاكسينالار اۋىل- ايماقتارعا جەتكىزىلگەن. قازاننىڭ 3 ىنەن باستاپ ەكپە جۇمىستارى بارلىق جەردە باستالادى.
