ەۋرازيا ۋنيۆەرسيتەتى 3 جاڭا ماماندىق بويىنشا ماگيسترلەردى دايىنداۋعا كىرىستى
بۇعان دەيىن جوعارعى وقۋ ورنى «قۇرىلىس ماتەريالدارى، بۇيىمدار مەن كونسترۋكتسيالارى ءوندىرىسى»، «عارىشتىق تەحنيكا جانە تەحنولوگيالار» ماماندىقتارى بويىنشا مامان دايىنداۋدى قولعا العان بولاتىن. بۇل تۋرالى بۇگىن ەل جۇرتشىلىعى، قوعام جانە ب ا ق وكىلدەرى، ۋنيۆەرسيتەت ۇجىمى مەن ستۋدەنتتەرى الدىندا ەسەپ بەرگەن ل. ن. گۋميليەۆ اتىنداعى ە ۇ ۋ رەكتورى ەرلان سىدىقوۆ ءمالىم ەتتى.
قازىر وسى جاڭا ماماندىقتاردى ساپالى دايىنداۋعا مۇمكىندىك بەرەتىن جالپى سوماسى 449104 مىڭ تەڭگە بولاتىن «قۇرىلىس ماتەريالدارى مەن بۇيىمدارى زەرتحاناسى»، «شاعىن عارىشتىق اپپاراتتار زەرتحاناسى» قۇرىلدى. ولار بىرەگەي قۇرىلعىلارمەن جابدىقتالعان. مۇنى فيزيكا، نانوتەحنولوگيا، فيزيكالىق جانە ساراپتامالىق حيميا، بيوتەحنولوگيا سياقتى ءپانارالىق سالالاردا قولدانۋعا بولادى. وسى جىلدىڭ سوڭىنا دەيىن تاعى ەكى زەرتحانا اشۋ جوسپارلانىپ وتىر. بۇل ماماندىقتاردا 579 ماگيسترانت ءبىلىم الادى. ولار الەمدىك ۋنيۆەرسيتەتتەردىڭ ستاندارتتارىنا سايكەس تاجىريبەگە باعىتتالعان ءبىلىم باعدارلامالارى نەگىزىندە وقيدى. ءبىلىم باعدارلامالارىن ىسكە اسىرۋعا وڭتۇستىك كورەيا، تۇركيا، قىتاي، پولشا، گەرمانيا سەرىكتەس جوعارى وقۋ ورىندارى قاتىسادى.
