استاناداعى كەڭسەلەردىڭ بىرىندە 3 مەترلىك الىپ جىلان ءومىر سۇرەدى – فوتو، كەسكىن
تروپيكالىق ايماقتا مەكەندەيتىن ۋى جوق بۇل جىلان قازىرگى كىپ- كىشكەنە ءشىل ۇيىنە ابدەن ۇيرەنگەن سياقتى. «قازاقپارات» تىلشىلەرى بۇگىن «بالاشكا» اتتى جىلاننىڭ «ۇيىنە» بارىپ، ادام ايتسا سەنگىسىز تىرشىلىكپەن تانىسىپ قايتتى.
«مەنىڭ اتى- ءجونىم توقبەرگەن ابيەۆ. ءوزىم جۋرناليست ءارى زاڭگەرمىن. بۇل جىلاندى وسى جىلدىڭ قىسىندا ماعان سىيعا تارتقان. قازىر جاسى ۇشتە. ۇزىندىعى 3 مەتر. تەرراريۋم جاساپ، جىلانىمدى باعىپ- قاعامىن. وعان ابدەن ۇيرەنىپ الدىم. ونىڭ اتى - بالاشكا. ابيەۆ بالاشكا توقبەرگەن ۇلى دەپ ازىلدەيمىن كوبىنە. تروپيكالىق ايماقتى مەكەندەگەن جورعالاۋشى اۋىرىپ قالماسىن دەپ، جىلى مەزگىلدەردە كەڭسەنىڭ الدىنا شىعارىپ «قىدىرتامىن» . جۇرگەن- تۇرعان ادامدار ارينە، جابايى جورعالاۋشىنى كورگەندە شوشىپ تا جاتادى. قىزىعىپ، سۋرەتكە ءتۇسىپ جاتاتىندار دا بار. كەيبىر ادامدار ءتىپتى، جىلانمەن سۋرەتكە ءتۇسۋ ءۇشىن مەنى اقشا الادى دەپ ويلايدى ەكەن. ولاي ەمەس. سۇراعى بار ادامدارعا تەگىن ءتۇسىندىرىپ، تەگىن سۋرەتكە تۇسۋگە رۇقسات بەرەمىن. سوندىقتان بولار، الەۋمەتتىك جەلىنى ارالاعان سۋرەتتەر «بالاشكانى» جۇلدىزعا اينالدىرىپ كەلەدى. جالپى، دالاعا شىعارىپ جۇرگەنىمنىڭ ءبىر سەبەبى - بالاشكا ادامدارعا كوپ ۇيرەنسە دەيمىن. قانشا دەگەنمەن، جابايى جورعالاۋشى عوي. ال، وزىمە ابدەن ۇيرەنگەن. مەنى ۇعىپ، تۇسىنەدى دەپ ويلايمىن. ءوزىم جۋىندىرىپ، ءوزىم استى- ءۇستىن تازالايمىن» ، - دەيدى جىلاننىڭ قاسىندا وتىرىپ ەمەن- جارقىن اڭگىمەلەسكەن ت. ابيەۆ.
جالپى، توقبەرگەن ابيەۆ اقپاراتتىق- قۇقىقتىق پورتالدىڭ جەتەكشىسى رەتىندە سونداي- اق، جەمقورلىققا قارسى كۇرەس جونىندەگى ءوزى قۇرعان دەپارتامەنتتىڭ باسشىسى رەتىندە سىبايلاس جەمقورلىقپەن كۇرەسۋ ءىسىن ءبىرىنشى ماقساتى دەپ بەلگىلەگەن ەكەن. «ال، اسىراپ وتىرعان جىلانىم جەمقورلار مەن الاياقتاردى تەز تانىپ، ولاردى بىردەن قىلقىندىرادى. جۇمىسقا قابىلدايتىن ءار ادامدى بالاشكانىڭ تەكسەرۋىنەن وتكىزەتىن بولدىم» ، - دەيدى ءازىل- شىنىن ارالاستىرعان ت. ابيەۆ.
«ايىنا ءبىر رەت ءبىر قويان نەمەسە ءبىر تاۋىق جەيدى. ەڭ ازى، 20 كۇندە ءبىر رەت وسىلاي تاماقتاندىرامىن. بىرنەشە كۇن ىشىندە كەپتەلىپ تۇرادى دا سول تاماعىن ءبىر اي بويى قورىتادى. جولبارىس ءتارىزدى ۋى جوق بۇل ءىرى جىلاننىڭ ۇزىندىعى 9 مەترگە دەيىن جەتەدى ەكەن. ءبىراق، سابىرلى جىلان. جەمىن بۋىندىرىپ ولتىرەدى. مەنىڭ ەستۋىمشە، يەسىنە شاباتىن جىلاندار بار. ءبىراق، بۇل پيتون ماعان تيىسپەيدى، ءتىپتى اۋزىندا اشپايدى. كەيدە سۋدان شىققىسى كەلمەگەندە عانا ىسىلداعان داۋىس شىعارادى. تاماق ىشكەننەن كەيىن دە مازالاپ، تيىسپەۋ كەرەك. دالاعا شىعارعاندا دا، كەڭسەدە دە مەن قاسىندامىن، سوندىقتان، ءبىر جاققا جورعالاپ كەتپەيدى. قانشا جەردەن قولعا ۇيرەنسە دە، جىلاننىڭ اتى جىلان عوي. سوندىقتان، ايەلىم «بالالاردىڭ قاۋىپسىزدىگى ءۇشىن ۇيگە ۇستامايىق» ، دەدى. وسىلايشا، مىنە، بالاشكا اتتى جىلان كەڭسەدە ءومىر ءسۇرىپ جاتىر» ، - دەيدى ول.
توقبەرگەن ابيەۆتىڭ سالت- ءداستۇرى بويىنشا، «قازاقپارات» تىلشىلەرى دە ۋسىز جىلاننىڭ «جەمقورلىققا قارسى» تەكسەرۋىنەن ءوتتى. دەنەسى تاستاي سۋىق، ءوزى اۋىر. سابىرلى. شاپ بەرمەيدى. ءبىرىنشى رەت كورىپ تۇرعانىنا قاراماستان، ونىڭ ۇستىنە، كامەرا مەن وزگە دە ۋ- شۋعا قاراماستان تىلشىلەردى قىلقىندىرىپ، شابۋىل جاساعان جوق. كەرىسىنشە، مويىننان تۇسكىسى كەلمەي، اينالاسىندا بولىپ جاتقان وقيعاعا تاڭىرقاي قارادى.
