قازاقستاندا وتاندىق قانتتىڭ ۇلەسى نەبارى 3 پايىزعا تەڭ
بۇل تۋرالى بۇگىن اۋىل شارۋاشىلىعى ۆيتسە- ءمينيسترى قايرات ايتۋعانوۆ ءمالىم ەتتى.
«ونىڭ ۇستىنە بۇل كولەمنىڭ نەگىزگى بولىگى - 55 پايىزى يمپورتتالاتىن قانت قۇراعىنان جاسالادى. قانت قۇراعىن ءبىز برازيليا جانە كۋبا ەلدەرىنەن ساتىپ الامىز. دايىن قانتتىڭ تىكەلەي يمپورتى 42 پايىزدى قۇرايدى. ول بەلارۋس، مولدوۆا، پولشا، ۋكراينا، برازيليا مەملەكەتتەرىنەن جەتكىزىلەدى»، - دەدى ق. ايتۋعانوۆ مينيسترلىكتە وتكەن باسپا ءسوز ءماسليحاتىندا.
ەسكە سالا كەتەيىك، يمپورتتالاتىن قانتقا ۇلكەن تاۋەلدىلىك بولعاندىقتان، قانت باعاسى شارىقتاپ كەتتى. ق ر ۇلتتىق ەكونوميكا مينيسترلىگىنىڭ مالىمەتى بويىنشا، باعا 10 پايىزعا جوعارلاعان. ءبىراق كەيبىر دۇكەندەردە ونىڭ باعاسى 2 ەسەگە دەيىن اسپانداپ كەتكەن بولاتىن. بۇل قانت شيكىزاتىنىڭ تونناسىنا 354 دوللاردان 477 دوللارعا دەيىن كوتەرىلۋىنەن ورىن الدى.
سونىمەن قاتار ق. ايتۋعانوۆ قازاقستاندا وندىرىستىك قۋات تولىق قولدانىلماي وتىرعاندىعىن اتاپ ءوتتى. الەۋەتتىڭ تەك 37 پايىزى قولدانىلىپ وتىر.
دەگەنمەن سوڭعى جىلدارى قانت قىزىلشاسىنىڭ ەگىستىك القاپتارى ەداۋىر ۇلعايعان. 2014 -جىلى الماتى جانە جامبىل وبلىستارىندا قانت قىزىلشاسىنىڭ القاپتارى 1,2 مىڭ گەكتاردى قۇراسا، بيىل ەگىستىك 12,9 مىڭ گەكتاردى قۇراعان.
العاش رەت سولتۇستىك قازاقستاندا قانت قىزىلشاسى وسىرىلە باستادى. شال اقىن اۋدانىندا 400 گەكتار القاپقا قانت قىزىلشاسى ەگىلگەن. ءونىمدى جيناۋ باستالدى، گەكتارىنا 50-55 توننا قانتتىلىعى 15-17 پايىزدى قۇرايتىن قانت قىزىلشاسى جينالادى دەپ بولجانۋدا.
«2015 -جىلدان بەرى قانت قىزىلشاسىن ساتىپ الۋعا كەتكەن شىعىن مەملەكەتپەن سۋبسيديالانادى. بۇگىندە قانت زاۋىتتارى قىزىلشانى كەلىسىنە 14 تەڭگەدەن ساتىپ الادى، ونىڭ 6 تەڭگەسىن مەملەكەت سۋبسيديالايدى»، - دەدى ۆيتسە- مينيستر.
اۆتور: جاسۇلان جولدىبايەۆ
