پرەزيدەنت: قازاقستان حالقىنىڭ 3 پايىزى عانا كەدەيلىك شەگىندە ءومىر سۇرۋدە
بۇل تۋرالى بۇگىن استانا ەكونوميكالىق فورۋمىندا مەملەكەت باسشىسى نۇرسۇلتان نازاربايەۆ ءمالىم ەتتى.
«ءبىز حالىق كىرىسىنىڭ اراجىگىن الىستاتپاي، كەدەيلىك دەڭگەيىن الدەقايدا ازايتتىق. ەگەر دە، 1990 -جىلداردىڭ باسىندا ءاربىر ءۇشىنشى قازاقستاندىق (40 پايىزى) كەدەيلىك شەگىندە ءومىر سۇرگەن بولسا، ال، قازىر كەدەيلىك شەگىندە ءومىر سۇرەتىن حالىقتىڭ ۇلەسى - 3 پايىز. ەكونوميكامىزدى ەندى كوتەرىپ جاتقاندا، ءبىز تۇتىنۋ دۇربەلەڭىنە شالدىقپاي، ادامي كاپيتالعا ينۆەستيتسيا سالدىق»، - دەدى ن. نازاربايەۆ.
مەملەكەت باسشىسى اتاپ وتكەندەي، ادام كاپيتالىنان وزگە قازاقستاننىڭ ماڭىزدى دامۋ باعىتى - ينفراقۇرىلىم مەن يندۋستريالاندىرۋ بولىپ وتىر. «قازاقستاننىڭ يندۋستريالىق- يننوۆاتسيالىق ساياساتى، ينفراقۇرىلىمعا ينۆەستيتسيا قۇيۋ ساياساتى ورنىقتى جىلدار ىشىندە قيىن كۇندەرگە قور جيناۋعا مۇمكىندىك بەردى»، - دەپ اتاپ ءوتتى پرەزيدەنت.
اۆتور: كەنجەكەي توقتامۇرات قىزى
