عالىمدار 3 جاسقا تولماعان بالامەن الىستا دەمالۋدى قۇپتامايدى
ال ول بالانىڭ دەنساۋلىعىنا ايتارلىقتاي پايدالى ەمەس.
ءومىرىنىڭ العاشقى ءۇش جىلىندا بالانىڭ يممۋنيتەتى وتە بەلسەندى قالىپتاسا باستايدى. وتباسى تۇرىپ جاتقان ۇيدەن باستاپ، بۇلدىرشىنمەن قارىم- قاتىناستا بولاتىن اتا- اناسىنىڭ، وزگە ادامداردىڭ تەرىسىندە، شىرىشتى قاباتىندا ەرەكشە باكتەريالار مەن ۆيرۋستار بولادى. بالانىڭ يممۋنيتەتى سولاردىڭ بارلىعىمەن تانىسىپ، انتيدەنە دەپ اتالىناتىن ەرەكشە قورعانىش جاسۋشالارىن قالىپتاستىرۋى قاجەت. ءبۇلدىرشىن ءۇشىن ميكروبتىق ورتانى اۋىستىرۋ - سترەسس تۋعىزاتىن جاعداي. بالالار (اسىرەسە 1 جاسقا دەيىنگى ) ەرەسەكتەرگە قاراعاندا سوزىلمالى سترەسستى عانا ەمەس، كەز- كەلگەن سترەسستى اۋىر قابىلدايدى. بۇنداي جاعدايلار يممۋندىق جۇيەنىڭ جۇمىسىن السىرەتەدى.
اۋانىڭ جوعارعى تەمپەراتۋراسى (25 گرادۋستان باستاپ) دا بالاعا زيانىن تيگىزەدى. ويتكەنى، كىشكەنتاي بالانىڭ جىلۋ الماسۋ مەحانيزمى تولىق جەتىلمەگەن بولعاندىقتان، ولار تەز ىستىقتاپ، جىلۋلىق سوققى الادى. ۇزاق ساياحاتتان سوڭ تۋعان ەلىنە كەلگەن بالا كليماتتىڭ وزگەرۋىنە قايتادان ۇيرەنۋى قاجەت. سالقىنداپ قالعان جاعدايدا كوپ بۇلدىرشىندەر اسقىنعان تىنىس جولدارىنىڭ ۆيرۋستى ينفەكسياسىمەن اۋىرادى.
قورىتا كەلگەندە، جاسىنا تولماعان بالامەن ۇزاق ساياحاتتاۋ، اسىرەسە تەڭىزگە بارۋ پايدالى ەمەس. ءۇش جاسقا دەيىنگى بالالارمەن قالا سىرتىندا نەمەسە كليمات اۋىسپايتىن جاعدايدا دەمالۋ قاجەت.
yvision.kz سايتىنان الىندى.