قازاقستاننىڭ 3 وبلىسىندا اۋا رايىنىڭ قولايسىزدىعىنا بايلانىستى جول جابىلدى

استانا. قازاقپارات - قوستاناي، سولتۇستىك قازاقستان، اقتوبە وبلىستارىندا اۋا رايىنىڭ قولايسىزدىعى سالدارىنان رەسپۋبليكالىق ماڭىزى بار جولداردا كولىك قوزعالىسىنا شەكتەۋ ەنگىزىلدى، دەپ حابارلادى «قازاۆتوجول» ر م ك باسپا ءسوز قىزمەتى.

بۇگىن، 24 -ناۋرىزدا قوستاناي وبلىسىندا ساعات 15.00 دە اۋا رايىنىڭ ناشارلاۋىنا بايلانىستى (بوران، جولدىڭ كورىنبەۋى) «قوستاناي- اۋليەكول- سۇرعان» (108-232 شاقىرىم) اۆتوجولىندا، اۋليەكول كەنتىنەن اقمولا وبلىسىنىڭ شەكاراسىنا دەيىنگى ۋچاسكەدە جۇك جانە قوعامدىق كولىكتەر ءۇشىن جول قوزعالىسى شەكتەلدى.

ساعات 18.00 دە اۋا رايىنىڭ ناشارلاۋىنا بايلانىستى (بوران، جولدىڭ كورىنبەۋى) «مامليۋتكا- قوستاناي (180-243 شاقىرىم)، س ق و شەكاراسىنان ۇزىنكول كەنتىنە دەيىن، «ەكاتەرينبۋرگ- الماتى» (686-729 شاقىرىم)، سارىكول كەنتىنەن س ق و شەكاراسىنا دەيىنگى ۋچاسكەدە كولىكتىڭ بارلىق تۇرلەرى ءۇشىن جول جابىلدى.

س ق و- دا ساعات 17.00 دە اۋا رايىنىڭ ناشارلاۋىنا بايلانىستى (قار، بوران، جولدىڭ كورىنبەۋى) بارلىق باعىت بويىنشا كولىكتىڭ بارلىق تۇرلەرى ءۇشىن جول جابىلدى.

بۇدان باسقا، اقتوبە وبلىسىندا 219 شاقىرىمىندا جول ۇستىنەن ەنى 50-60 م، بيىكتىگى 1 م بولاتىن قار سۋى اعىپ جاتۋىنا بايلانىستى «قاندىاعاش- ەمبى- شالقار- ىرعىز» اۆتوجولىنىڭ 200-220 شاقىرىمى ارالىعىندا، ياعني موڭكە ءبي اۋىلىنان قايداۋىل كەنتىنە دەيىن كولىكتىڭ بارلىق تۇرىنە جول قوزعالىسى شەكتەلدى.