سولتۇستىك قازاقستاندا وبلىستىق بيۋجەتتەن بولىنگەن 3 ميللياردتان استام تەڭگە ماقساتىنا سايكەسسىز جۇمسالعان

پەتروپاۆل. قازاقپارات - سولتۇستىك قازاقستان وبلىسىندا تەكسەرۋ كوميسسياسى بيىلعى جىلعى 10 ايدىڭ قورىتىندىلارى بويىنشا وبلىستىق بيۋجەتتەن قارجىلاندىرىلاتىن 65 مەكەمەنى تەكسەردى.

تەكسەرىس قورىتىندىلارى بويىنشا، 3 ميللياردتان استام تەڭگە ماقساتسىز جۇمسالعانى انىقتالعان. بۇل تۋرالى س ق و بويىنشا تەكسەرۋ كوميسسياسىنىڭ مۇشەسى اماندىق سەيفۋللين حابارلادى.

تەكسەرۋ كوميسسيالارى وبلىستىق بيۋجەتتەن قارجىلاندىرىلاتىن وبلىستاعى بارلىق ۇيىمداردى تەكسەرەدى. مەملەكەتتىك قازىنانىڭ ءاربىر تەڭگەسى بۇل ۆەدومستۆونىڭ ەرەكشە باقىلاۋىندا.

«10 ايدىڭ ىشىندە 65 نىساندا 15 تەكسەرىس جۇرگىزدىك. بۇل رەتتە 23 ميلليارد 209 ميلليون تەڭگە باقىلاۋعا الىنعان. قارجىلىق ءتارتىپتىڭ 3 ميلليارد 994 ميلليون تەڭگە سومانى قۇرايتىن زاڭ بۇزۋشىلىعى انىقتالدى. انىقتالعان بۇزۋشىلىقتاردىڭ جالپى سوماسىنان 242 ميلليون تەڭگە قايتا تولەنۋى ءتيىس. بۇگىندە نىساندار 169 ميلليون تەڭگەنى قايتاردى. قالعان 71 ميلليون بويىنشا ورىنداۋ مەرزىمى ءالى كەلگەن جوق»، - دەپ باياندادى سەيفۋللين.

بيۋجەتتىك قاراجاتتى جۇمساۋ كەزىندە جول بەرىلگەن بۇزۋشىلىقتار - قارجىنىڭ ماقساتقا ساي جۇمسالماۋى، مەملەكەتتىك ساتىپ الۋلار ۇدەرىسىنىڭ بۇزىلۋى، شتاتقا رۇقسات ەتىلگەننەن كوپ قىزمەتكەر الۋ. وسىنداي فاكتىلەر سانى بويىنشا اقجار اۋداندىق ءبىلىم ءبولىمى كوش باستاپ تۇر، دەيدى ريەۆيزورلار. 400 ميلليوننان استام تەڭگە زاڭ بۇزۋشىلىقپەن پايدالانىلعان.

بارلىق تەكسەرىستەردىڭ قورىتىندىلارى بويىنشا 200 دەن استام سولتۇستىك قازاقستاندىق اكىمشىلىك جانە تارتىپتىك جاۋاپكەرشىلىككە تارتىلدى. ەندى ولار جالپى سوماسى 15 ميلليوننان استام تەڭگەنى قۇرايتىن ايىپپۇل تولەۋى ءتيىس.