استانادا 3 مىڭنان استام بالا ارنايى بىلىممەن قامتىلعان
استانا قالاسى ءبىلىم باسقارماسىنىڭ حابارلاۋىنشا، ەلوردانىڭ ءبىلىم بەرۋ مەكەمەلەرىندە 3269 ەرەكشە بالا بار، ونىڭ ىشىندە 217 سى ارنايى مەكتەپ-ينتەرناتتاردا، 345 سى ۇيدە وقيدى، ال مەكتەپكە دەيىنگى مەكەمەلەردە 1040 بالا، ارنايى بالاباقشالاردا 322 بالا، كوللەدجدەردە 108 وقۋشى ءبىلىم الادى.
№ 10 -مەكتەپ-گيمنازيادا كوزى ناشار كورەتىن بالالارعا ارنالعان 18 سىنىپ اشىلدى. وسى وقۋشىلارعا كوررەكسيالىق(وڭشاۋ - رەد.) جانە مەديتسينالىق كومەك كورسەتۋ ءۇشىن قاجەتتى كەرەك- جاراقتارمەن جابدىقتالعان مەديتسينالىق كابينەت جۇمىس ىستەيدى. ونىڭ شتاتىندا دارىگەر، ەكى تيفلوپەداگوگ جانە مەدبيكە بار.
№65 -مەكتەپ- گيمنازياسىندا ناشار ەستيتىن جانە تىرەك- قيمىل اپپاراتى بۇزىلعان بالالارعا ارنالعان 11 -سىنىپتا ءتورت جىل بويى 85 بالا وقيدى. ءبىلىم وشاعىنىڭ عيماراتىندا مۇگەدەك بالالاردىڭ ەركىن ءجۇرىپ- تۇرۋىنا قولايلى جاعداي جاسالعان. سونىمەن قاتار، مەكتەپ ويىن بولمەسىمەن، ارنايى دارەتحانالارمەن، ۆەرتيكيليزاتورلارمەن(وزدىگىنەن تۇرا المايتىن ادامدارعا ارنالعان قۇرىلعىلار - رەد.)، قولايلى پارتالارمەن جابدىقتالعان.
2014-2015 وقۋ جىلىندا № 63، 74، 78 مەكتەپتەردە دە ينكليۋزيۆتى ءبىلىم بەرۋ ەنگىزىلدى. № 75 -جاڭا مەكتەپتە سويلەۋ قابىلەتى ناشار 17 بالاعا ەكى سىنىپ اشىلدى. № 23 -ورتا مەكتەپتە اۋتيزممەن اۋىراتىن(مي دامۋىنىڭ ارتتا قالۋىنان اينالاسىمەن قالىپتى بايلانىسقا تۇسە الماۋشىلىق - رەد.) 5 بالاعا ارنايى رەسۋرستىق سىنىپتار اشىلدى.