قىزىلوردادا ەر ادامدى ازاپتاعان 3 پوليتسەي سوتتالدى

استانا. قازاقپارات - قىزىلوردا قالاسىنىڭ №2 سوتى بۇرىنعى پوليتسيا قىزمەتكەرلەرىنە قاتىستى قىلمىستىق ءىستى قارادى، دەپ حابارلايدى وبلىستىق سوتتىڭ باسپا ءسوز قىزمەتىنەن.

سوتتالۋشىلار ا. ءشامبىلوۆ، ە. قوجاتايەۆ پەن ب. شوقاتايەۆ قىزىلوردا قالالىق ىشكى ىستەر باسقارماسىنىڭ كريمينالدى پوليتسيا ءبولىمىنىڭ جەدەل ۋاكىلى قىزمەتىن اتقارا وتىرىپ، مەملەكەتتىك قىزمەت اتقارۋعا ۋاكىلەتتى لاۋازىمدى ادامدار بولا تۇرا، جابىرلەنۋشى د. دوستانوۆقا جاساماعان ۇرلىق قىلمىسىن مويىنداۋعا ماجبۇرلەپ، قاساقانا فيزيكالىق جانە پسيحيكالىق زارداپ شەكتىرىپ، ونىڭ زاڭمەن قورعالاتىن قۇقىقتارى مەن مۇددەلەرىن ەلەۋلى تۇردە بۇزعان.

سوتقا دەيىنگى تەرگەپ، تەكسەرۋ ارەكەتتەرىن جۇرگىزگەندە جابىرلەنۋشى د. دوستانوۆتىڭ قىلمىسقا قاتىستىلىعى دالەلدەنبەگەندىكتەن، قىلمىستىق قۋدالاۋ توقتاتىلعان.

قىزىلوردا قالاسىنىڭ №2 -سوتىنىڭ ۇكىمىمەن سوتتالۋشىلار قازاقستان رەسپۋبليكاسىنىڭ قىلمىستىق كودەكسىنىڭ 146-بابى 2-بولىگىنىڭ 1-تارماعى بويىنشا (قاساقانا ءتان زاردابىن جانە (نەمەسە) پسيحيكالىق زارداپ شەكتىرۋ) كىنالى دەپ تانىلىپ، 3 جىلعا باس بوستاندىقتارىنان ايىرۋعا سوتتالدى.

ولار جازالارىن تۇزەۋ كولونياسىنىڭ جالپى رەجىمىندە وتەيتىن بولدى. سونداي- اق سوتتالۋشىلار مەملەكەتتىك، قۇقىق قورعاۋ ورگاندارىندا قىزمەت اتقارۋ قۇقىقتارىنان ايىرىلدى.

ۇكىم زاڭدى كۇشىنە ەنگەن جوق.