جامبىل وبلىسىندا 3 اۋداننىڭ اكىمى جاڭادان تاعايىندالدى

 تاراز. قازاقپارات - بۇگىن جامبىل وبلىسىنىڭ اكىمى كارىم كوكىرەكبايەۆتىڭ وكىمىمەن وبلىستاعى ءۇش اۋدان اكىمى جاڭادان تاعايىندالدى.

 ناقتىراق ايتقاندا، بۇرىنعى شۋ اۋدانىنىڭ اكىمى باقىتجان نۇركەنوۆ مويىنقۇم اۋدانىنا باسشى بولدى. ول 2010 -جىلدىڭ اقپان ايىنان بەرى شۋ اۋدانى اكىمىنىڭ ورىنباسارى لاۋازىمىندا قىزمەت اتقارىپ، 2013 -جىلدىڭ 28 ماۋسىمىنان باستاپ شۋ اۋدانىنىڭ اكىمى بولىپ تاعايىندالعان.

 ال، شۋ اۋدانىنىڭ اكىمى بولىپ، رۇستەم داۋلەت تاعايىندالدى. ول 2013 - جىلدىڭ 27 - ماۋسىمىنان بەرى جامبىل اۋدانىنىڭ اكىمى بولىپ قىزمەت اتقاردى.

جامبىل اۋدانىنىڭ اكىمى قىزمەتىنە مادەن مۇسايەۆ تاعايىندالدى. ول 1963 - جىلى 8 - قاراشادا شۋ اۋدانى جامبىل وبلىسىندا دۇنيەگە كەلگەن.

الماتى زووتەحنيكالىق مال دارىگەرلىك ينستيتۋتىن، قىرعىز مەملەكەتتىك ۇلتتىق ۋنيۆەرسيتەتىن مال دارىگەرى، زاڭگەر ماماندىقتارى بويىنشا بىتىرگەن.

2004 -جىلى قازاقستان رەسپۋبليكاسى اۋىل شارۋاشىلىعى مينيسترلىگىنىڭ قورداي اۋداندىق اۋماقتىق باسقارماسى باسشىسى. 2004-2006 - جىلدارى شۋ اۋدانى اكىمىنىڭ ورىنباسارى، 2008-2010 - جىلدارى مويىنقۇم اۋدانىنىڭ اكىمى، 2010 - جىلى جامبىل وبلىسى اكىمىنىڭ كەڭەسشىسى لاۋازىمدارىن اتقارعان.

2010 - جىلدىڭ شىلدە ايىنان باستاپ، الماتى وبلىسى ىلە اۋدانى اكىمىنىڭ ورىنباسارى قىزمەتىن اتقارعان.