الماتىدا 3 جەزوكشەلەر ورداسى اشكەرەلەندى
بۇل تۋرالى قالالىق ىشكى ىستەر دەپارتامەنتىنىڭ باسپا ءسوز قىزمەتى حابارلادى.
اتالعان وردالاردىڭ ەكەۋى تۇركسىب اۋدانىندا ورنالاسقان ەكى قوناقۇيدە اشىلعان. جەڭىل جولمەن اقشا تابۋدى كوزدەگەن قوناقۇي اكىمشىلەرى قىلمىستىق جاۋاپكەرشىلىككە تارتىلاتىن بولادى.
ءى ءى د ۇيىمداسقان قىلمىسقا قارسى كۇرەس باسقارماسىنىڭ دەرەگى بويىنشا، جەڭىل ءجۇرىستى كاسىپ ەتكەن قىزدار مەكەمە باسشىلىعىمەن اۋىز جالاسىپ، تابىسىنىڭ جارتىسىن سولارعا بەرىپ وتىرعان.
جاقىندا ءدال وسىنداي وردا المالى اۋدانىنداعى ساۋنالاردىڭ بىرىندە انىقتالدى. 50 جاستاعى ساۋنا اكىمشىسى جەڭىل ءجۇرىستى بيكەدەن 4500 تەڭگە الىپ جاتقان كەزىندە قولعا ءتۇستى.
سونداي- اق، الماتىدا كولىك جوندەۋ ورنىنان دا «تۇنگى كوبەلەكتەردىڭ ۇياسى» تابىلدى. سويتسە، جان- جاقتان جينالعان جەزوكشەلەر كۇندىز قاراپايىم كولىك جۋۋشى بولىپ، ال ناعىز «قىزمەتىن» تۇندە اتقارادى ەكەن. لاس عيمارات ىشىندە ءتىپتى جۋىناتىن بولمە دە جوق. بۇرىن- سوڭدى مۇنداي سۇمدىققا جولىقپاعان پوليتسەيلەردىڭ وزدەرى استىرتىن «قوناق ۇيدەگى» كورىنىستى كورىپ، جاعالارىن ۇستادى.
كولىك جوندەۋ ستانتسياسىنىڭ ىشىندە 20 بولمە! ءبىراق، بۇل توسەكتەردە جاتقان مەحانيكتەر ەمەس، ناعىز «ەڭبەكقور» ايەلدەر. كۇندىز كولىك جۋىپ، تۇندە توسەك ۇستىندە تابىس تابادى.
اۆتور: گۇلميرا عوسمانالي
