قازاقستاندا تۋريستىك سالاداعى جوبالارعا 39 ميلليارد تەڭگە ينۆەستيتسيا تارتىلماق
كەيىنگى بەس جىلدا تۋريزم سالاسى قارقىندى تۇردە وركەندەپ، الەم ەكونوميكاسىندا قارىشتاپ دامىعان سالالاردىڭ بىرىنە اينالدى. قازىرگى تاڭدا تۋريزم سالاسى مۇناي وپەراتسياسىنىڭ، ازىق-تۇلىك ساۋداسى مەن اۆتوكولىك سالاسىنىڭ ىسكەرلىك كولەمىنەن وزىپ كەتكەن. ءبىرقاتار مەملەكەت ءۇشىن تۋريزم سالاسى نەگىزگى كىرىس كوزى بولىپ وتىر.
قازاقستان ۇكىمەتى ق ر تۋريزم سالاسىن دامىتۋ تۋرالى 2023-جىلعا دەيىنگى تۇجىرىمداماسى مەن ق ر تۋريستىك سالاسىن دامىتۋدىڭ 2019-2025-جىلدارعا ارنالعان مەملەكەتتىك باعدارلاماسىن قابىلداعان. ماڭىزدى قۇجاتتاردى قابىلداۋداعى ماقسات - ىشكى جانە سىرتقى تۋريزمدى دامىتۋ، ايماقتىق مادەني-تۋريستىك كەشەندەردى وركەندەتۋ، ينۆەستيتسيا سالۋعا جىگەرلەندىرۋ، تۋريستىك ونىمدەردىڭ ساپاسى ارتتىرىپ، باسەكەگە قابىلەتتىگىنى ۇشتاۋ، تۋريستىك ينفراقۇرىلىمدى دامىتۋ، ىشكى جانە حالىقارالىق نارىقتاردا تۋريستىك دەستيناتسيالاردى جىلجىتۋ، ۇلتتىق ءبىرىڭعاي تۋريستىك برەندتى قالىپتاستىرۋ.
تۋريزم - وزگە سالالارمەن سەلبەسە جۇمىس جۇرگىزەتىن سالا. ياعني، ونىڭ دامۋى وزگە دە سالالارداعى جۇمىستاردىڭ جولعا قويىلۋىمەن تىكەلەي بايلانىستى.
تۋريزم سالاسىندا ءبىرىڭعاي ۇيلەستىرۋشى ءارى برەند-مەنەدجەر ءرولىن اتقارۋ ءۇشىن، سونىمەن بىرگە قازاقستاننىڭ تۋريستىك سالاسىن جۇيەلى ءارى ينستيتۋتسيونالدىق تۇرعىدا دامىتۋ ماقساتىندا ەلىمىزدە «Kazakh Tourism» ۇلتتىق كومپانياسى» اكتسيونەرلىك قوعامى قۇرىلعان بولاتىن.
«Kazakh Tourism» ۇلتتىق كومپانياسىنىڭ دامۋ ستراتەگياسىندا كورسەتىلگەندەي، قازاقستان حيكاياتتى، MICE، وقيعالى، تاريحي ءھام مادەني، مەديتسينالىق، ەكولوگيالىق، ەتنوگرافيالىق، بالالار مەن جاس وسپىرىمدەرگە ارنالعان باعىتتار بويىنشا تۋريزمدى دامىتۋدىڭ باسىمدىقتارىنا يە.
«وسىعان بايلانىستى تۋريستەر، بيزنەس پەن ينۆەستورلار ءۇشىن وتاندىق تۋريستىك ورىنداردىڭ ارتىقشىلىقتارىن كورسەتە ءبىلۋ ءۇشىن تۇبەگەيلى جۇيەلى ءارى كەشەندى شارالاردى قابىلداعان ابزال»، - دەپ جازىلعان جاريالانعان قۇجاتتا.
قازاقستاننىڭ تۋريستىك الەۋەتىن قارجىلىق تۇرعىدا دەمەۋ ءۇشىن «Kazakh Tourism» ۇلتتىق كومپانياسى وتاندىق جانە شەتەلدىك ينۆەستورلاردى سالاعا تارتۋ ىسىنە كۇش سالادى.
ماسەلەن، 2028-جىلعا دەيىن تۋريستىك سالاداعى جوبالارعا 39 ميلليارد تەڭگە تارتۋ كوزدەلگەن. جوبالاردى جۇزەگە اسىرۋ اياسىندا «Kazakh Tourism» ۇ ك- نىڭ قاتىسۋىمەن 2028-جىلعا دەيىن باسىمدىققا يە تۋريستىك دەستيناتسيالاردا نومىرلىك قوردى 1800 توسەك ورىنعا دەيىن كوبەيتۋ كوزدەلگەن.
قۇجاتتى كوپپەن بىرگە تالقىلاۋ جۇمىسى 31- جەلتوقسانعا دەيىن جالعاسادى.
