قازاقستاندا دەمالىس كۇندەرى 39 گرادۋسقا دەيىن اياز بولادى
استانا. قازاقپارات - «قازگيدرومەت» رمك 22-24- جەلتوقسانعا ارنالعان اۋا رايى بولجامىن جاريالادى، دەپ حابارلايدى قازاقپارات.
سينوپتيكتەردىڭ بولجامىنشا، قازاقستانعا اسەرىن تيگىزگەن انتيتسيكلون الداعى كۇندەرى السىرەگەنمەن اياز كۇشەيىپ، باتىس ءسىبىردىڭ ورتالىق اۋداندارىنا اۋىسادى. تسيكلون قازاقستانعا اسەرىن تيگىزەدى. سوندىقتان الداعى دەمالىس كۇندەرى جانە دۇيسەنبىدە ەلىمىزدە ايازدى، كوبىنە جاۋىن-شاشىنسىز كۇن رايى بولجانىپ وتىر.
رەسپۋبليكانىڭ جەكەلەگەن وڭىرلەرىندە قار جاۋىپ، وڭتۇستىك جانە وڭتۇستىك-شىعىس، باتىس ايماقتاردا تۇمان تۇسەدى، كوكتايعاق بولادى. ەلىمىزدىڭ سولتۇستىك، ورتالىق جانە شىعىس وبلىستارىندا تۇندە اۋانىڭ تەمپەراتۋراسى 30...39°س- عا دەيىن تومەندەيدى.