شىعىستىڭ كاسىپكەرلەرى ءبىر جىلدا 39 ميلليارد تەڭگە سالىق تولەگەن
بۇل تۋرالى وبلىس اكىمىنىڭ ورىنباسارى نۇرىمبەت ساقتاعانوۆ شاعىن بيزنەس وكىلدەرىمەن كەزدەسۋدە ايتتى، دەپ حابارلايدى قازاقپارات ءتىلشىسى.
كەزدەسۋگە جەڭىل ونەركاسىپ، سەرۆيس، تۋريزم جانە قايتا وڭدەۋ سياقتى ءتۇرلى سالالار بويىنشا بەلسەندى ءىس جۇرگىزىپ وتىرعان كاسىپكەرلەر شاقىرىلدى. ولار بىرنەشە اتالىم بويىنشا وبلىس اكىمىنىڭ العىس حاتتارى مەن گراموتالارىنا يە بولدى.
«شاعىن بيزنەستىڭ ءوڭىر ەكونوميكاسىنداعى ۇلەسى جىل سايىن ارتىپ كەلەدى. ءبىر جىلدىڭ ىشىندە سىزدەر بيۋدجەتكە 39 ميلليارد تەڭگەنىڭ سالىعىن تولەدىڭىزدەر. جەر-جەردە اشىلعان جاڭا بيزنەس نىسانداردىڭ ارقاسىندا 2000 نان استام جاڭا جۇمىس ورنى اشىلدى. مۇنىڭ ءبىر جاعىندا مەملەكەت تاراپىنان كورسەتىلىپ وتىرعان قولداۋلاردىڭ اسەرى دە بار. ءبىزدىڭ ءوڭىر شاعىن بيزنەس نىساندارىنا نەسيە بەرۋ جانە ونىڭ پايىزدىق مولشەرلەمەسىن سۋبسيديالاۋ كورسەتكىشتەرى بويىنشا ءۇشىنشى جىل قاتارىنان الدىڭعى ورىننان كورىنىپ وتىر. بيىل تەك يننوۆاتسيالىق گرانتتار ءۇشىن شاعىن بيزنەسكە وبلىس بيۋدجەتىنەن 150 ميلليون تەڭگە ءبولىندى» - دەدى وبلىس اكىمىنىڭ ورىنباسارى.
ەڭبەگى باعالانىپ، ماراپاتقا يە بولعان كاسىپكەرلەر اراسىندا مۇمكىندىگى شەكتەۋلى جاندار دا بولدى. سونىڭ ءبىرى - جاننا جابەكوۆا. كولىك اپاتىنىڭ كەسىرىنەن ارباعا تاڭىلعان ارۋ العاشقى كاسىبىن كوكپەكتى اۋدانىندا جۇمساق ويىنشىقتار تىگۋدەن باستاعان. ونىڭ قولىنان شىققان ويىنشىقتار مەن توقىلعان سەبەتتەر، مارجاننان ورىلگەن اشەكەيلەر قازىر كوپتىڭ سۇرانىسىنا يە.
«كاسىبىمنىڭ ورگە جۇزۋىنە «دامۋ» قورىنان العان 3 ميلليون تەڭگەلىك العاشقى گرانت جول اشتى. قازىر ماعان ىرگەدەگى رەسەيدەن تاپسىرىستار ءتۇسىپ جاتادى. بالاباقشالار مەن قايىرىمدىلىق قورلارى، الپاۋىت كومپانيالار دا كەلىسىمشارتقا وتىرىپ جاتىر. جۋىقتا «ارسەلور ميتتال» كومپانياسى حابارلاسىپ، ارىپتەستىك ورناتۋعا نيەت تانىتتى. مۇنشاما تاپسىرىستى ءوزىم جالعىز اتقارا المايتىنىم انىق. مەملەكەتتىڭ قولداۋىمەن زاماناۋي تىگىن اپپاراتتارىن العانبىز. شاعىن تسەحىمىز بار. ەندى سوندا جۇمىس ىستەيتىن قىزداردى ىزدەپ ءجۇرمىن» - دەيدى قايسار ارۋ.
قازاقستاننىڭ 100 جاڭا ەسىمى اتانعان جاننا جابەكوۆا وڭىردە تالپىنعان ادامعا بيزنەستى دوڭگەلەتىپ اكەتۋ بارلىق جاعداي جاسالعانىن ايتادى.
وبلىستىڭ تۇكپىر-تۇكپىرىنەن جينالعان شاعىن بيزنەس وكىلدەرى سالتاناتتى شارا بارىسىندا ءبىر-بىرىمەن جاقىن تانىسىپ، سەرىكتەستىك بايلانىس ورناتۋعا مۇمكىندىك الدى.
