بيىل وتاندىق 39 تەلەحيكايا ەكرانعا شىعادى

استانا. قازاقپارات - بيىل ەلىمىزدىڭ تەلەارنالارىندا 40-قا جۋىق جاڭا تەلەحيكايا كورەرمەن نازارىنا ۇسىنىلعالى وتىر. بۇل تۋرالى اقپارات جانە كوممۋنيكاتسيالار ءمينيسترى داۋرەن ابايەۆ مالىمدەدى.

 مينيستر «حابار» اگەنتتىگىنىڭ» تاپسىرىسى بويىنشا قولعا الىنعان «باتىرلار جولى» تاريحي كوركەم تەلەحيكاياسىنىڭ ءتۇسىرىلىم الاڭىندا بولىپ، شىعارماشىلىق توپپەن كەزدەستى.

بۇل - بەلگىلى ءانشى- كومپوزيتور قاپەز بايعابىل ۇلى انگە قوسقان ورتا مەركى جايلاۋى. ءتۇسىرۋ توبى ەكى اي بويى وسى ماڭداعى توعىزبۇلاق اۋىلىندا بولادى. سوندىقتان اسپازشىدان باستاپ سسەناريست جانە دەكوراتسياعا جاۋاپتى ادامدارعا دەيىن الا كەلگەن. ءتىپتى اكتەرلەرگە قاجەتتى كەيبىر كيىمدەر وسى جەردە تىگىلىپ جاتىر. ازىرگە «باتىرلار جولى» دەپ اتالاتىن تەلەحيكايانىڭ رەجيسسەرى - اسقار ۇزابايەۆ.

داۋرەن ابايەۆ، ق ر اقپارات جانە كوممۋنيكاتسيالار ءمينيسترى:

 - ەلباسىنىڭ تىكەلەي تاپسىرماسىمەن ءبىز وتاندىق سەريالداردىڭ، وتاندىق ءوزىمىزدىڭ شىعاراتىن كونتەنتتىڭ ساپاسىن دا، سانىن دا كوبەيتىپ جاتىرمىز. بۇل - تەك تاريحي سەريالدار عانا ەمەس، بۇل - بۇكىل جانرلاردى قامتىعان سەريالدار. ەڭ ۇلكەن، ەڭ باستى باعانى بىزگە ەندى تەلەكورەرمەن بەرەدى دەپ ويلايمىز.

«باتىرلار جولى» تاريحي تەلەحيكاياسىنىڭ باستى كەيىپكەرلەرى - قاراساي جانە اعىنتاي باتىرلار. فيلم XVII عاسىردىڭ باسىندا قازاق حالقى باستان كەشكەن وقيعالاردى بەينەلەيدى. قيىن- قىستاۋ كەزەڭدەگى ەلدىڭ تاتۋلىعى مەن باتىرلاردىڭ بىرلىگىن دارىپتەيدى.

 اسقار ۇزابايەۆ، رەجيسسەر:

- ماتەريالدى تەرەڭىرەك زەرتتەپ، لوكاتسياعا قاجەتتى جەر ىزدەگەندە ەلىمىزدىڭ كەڭدىگى مەن ادەمىلىگىنە تاعى ءبىر كوز جەتكىزدىم. وسىنداي ۇلان- عايىر جەردى ۇستاپ تۇرعان حالقىمىز شىنىندا دا مىقتى عوي.

بۇل - اسقار ۇزابايەۆتىڭ تاريح تاقىرىبىنا العاشقى قادامى. تاريحي فيلم - قيىن جانر. سوندىقتان تىڭعىلىقتى دايىندىق پەن ۇلكەن جاۋاپكەرشىلىك قاجەت. رەجيسسەر جاس اكتەرلەرگە سەنىم ارتىپ وتىر. ولاردىڭ بەينەلەگەن كەيىپكەرلەرى حالىق جادىندا ساقتالادى دەگەن ۇمىتتە.

نازار شارحان، اكتەر، قاراساي باتىر ءرولىن سومداۋشى:

 - قاراساي بابامىزدىڭ ەرلىگىن، باتىلدىعىن كورسەتۋ بۇل دا ءبىر ەرلىككە ءتان ءىس بولىپ سانالادى دەپ ويلايمىن. ەندى اللا ءناسىپ ەتسە، وسى ءرولدى بارشا ىنتا- جىگەرىممەن 100 پايىزعا بار كۇشىمدى سالامىن.

 8 بولىمنەن تۇراتىن كوركەم تاريحي تۋىندى جەلتوقسان ايىندا ەفيرگە شىعادى. جىل سوڭىنا دەيىن «حابار» ارناسى كورەرمەندەرگە بىرنەشە تەلەجوبالاردى ۇسىنادى. ولاردىڭ اراسىندا دراما، كومەديا، دەتەكتيۆ جانە وتباسىلىق تۋىندىلار بار.

www.24.kz