قازاقستاندا 39 رۇقسات بەرۋ قۇجاتتارىنىڭ كۇشى جويىلادى - ە. دوسايەۆ
بۇل تۋرالى بۇگىن ءماجىلىستىڭ جالپى وتىرىسىندا ۇلتتىق ەكونوميكا ءمينيسترى ەربولات دوسايەۆ ءمالىم ەتتى.
ەسكە سالايىق، جالپى وتىرىستا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە رۇقسات بەرۋ قۇجاتتارىن قىسقارتۋ جانە رۇقسات بەرۋ راسىمدەرىن وڭايلاتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تالقىلانعان بولاتىن.
«زاڭ جوباسىنا سايكەس، 39 رۇقساتتىڭ كۇشى جويىلادى. ياعني، زاڭنامادان، سونىمەن بىرگە رەتتەۋشى مەملەكەتتىك ورگاندار قۇزىرەتىنەن رۇقسات بەرۋ قۇجاتتارىن بەرۋ جونىندەگى فۋنكسيالاردى الىپ تاستاۋ كوزدەلگەن. بۇدان بولەك، 18 رۇقساتتى حابارلاما جاساۋ تارتىبىنە اۋىستىرۋ قاراستىرىلادى.
بۇل رەتتە كاسىپكەرگە قىزمەتتى باستاعانعا دەيىن رەتتەۋشى مەملەكەتتىك ورگانعا قاجەتتى اقپاراتتى كورسەتە وتىرىپ، حابارلاما جىبەرسە جەتكىلىكتى بولادى. ال 95 رۇقسات بەرۋ راسىمدەرى وڭتايلاندىرىلادى. وسىعان بايلانىستى «ءبىر تەرەزە» قاعيداتى بويىنشا، ياعني كاسىپكەرگە رۇقسات بەرگەن كەزدە كاسىپكەردىڭ قۇجاتتار جيناۋ مەن دايىنداۋعا بارىنشا از قاتىسۋىن، ونىڭ مەملەكتتىك ورگاندارمەن تىكەلەي بايلانىستارىن شەكتەۋدى كوزدەيتىن رۇقسات قۇجاتتارىن ورتالىقتاندىرىلعان تۇردە بەرۋ قامتىلادى»، - دەدى مينيستر ە. دوسايەۆ.
ونىڭ ايتۋىنشا، زاڭ جوباسىن قابىلداۋ بيزنەسكە دەگەن قىسىمدى ازايتۋعا، اكىمشىلىك توسقاۋىلدار سانىن قىسقارتۋعا، مەملەكەتتىك ورگانداردى ارتىق فۋنكسيالاردان ارىلتۋعا، سونىمەن بىرگە، كاسىپكەرلىكتى دامىتۋ ءۇشىن بارىنشا قولايلى جاعدايلار جاساۋعا مۇمكىندىك بەرەدى.
اۆتور: قانات مامەتقازى ۇلى
