قارجى ءمينيسترى: بىلتىر بيۋدجەتتەن 39,9 ميلليارد تەڭگە يگەرىلمەي قالدى

استانا. قازاقپارات - 2014-جىلدىڭ بيۋدجەتىنەن 39,9 ميلليارد تەڭگە يگەرىلمەي قالدى.

بۇگىن پارلامەنت ماجىلىسىندە قازاقستان رەسپۋبليكاسى ۇكىمەتىنىڭ 2014-جىلداعى رەسپۋبليكالىق بيۋدجەتتىڭ اتقارىلۋى تۋرالى ەسەبىن تانىستىرعان قارجى ءمينيسترى باقىت سۇلتانوۆ وسىلاي مالىمدەدى.

«وتكەن جىلعى بيۋدجەتتەن 39,9 ميلليارد تەڭگە يگەرىلمەي قالدى، قازاقستان رەسپۋبليكاسىنىڭ ۇكىمەتى رەزەرۆىنىڭ بولىنبەگەن قاراجاتىن (7,9 ميلليارد تەڭگە) شەگەرە وتىرىپ، يگەرىلمەۋ سوماسى 32,0 ميلليارد تەڭگەنى نەمەسە جۇرگىزىلگەن شىعىستاردىڭ جالپى كولەمىنەن 0,5 پايىزدى قۇرادى. ونىڭ ىشىندە 17,6 ميلليارد تەڭگەنىڭ قارجىلاندىرۋى ۋاقىتشا توقتاتىلدى (ينۆەستيتسيالار جانە دامۋ مينيسترلىگى - 10, ۇلتتىق ەكونوميكا مينيسترلىگى- 3, دەنساۋلىق ساقتاۋ جانە الەۋمەتتىك دامۋ مينيسترلىگى - 3 ميلليارد تەڭگە). مۇنداي اتقارماۋ اكىمشىلەرگە بايلانىستى ەمەس. 4,6 ميلليارد تەڭگە مەملەكەتتىك ساتىپ الۋ راسىمدەرىنىڭ جانە بيۋدجەتتىك راسىمدەردىڭ ۋاقتىلى وتكىزىلمەۋى سەبەبىنەن يگەرىلمەدى»، - دەدى قارجى ءمينيسترى.

ب. سۇلتانوۆتىڭ ايتۋىنشا، يگەرىلمەگەن 32,0 ميلليارد تەڭگەنىڭ 1,2 ميلليارد تەڭگەسى جالعاساتىن باعدارلامالار رەتىندە اعىمداعى جىلى تۇگەل پايدالانىلاتىن بولادى. سونىمەن قاتار، بيۋدجەتتى اتقارماۋدىڭ ەڭ ۇلكەن سومالارى مىناداي مينيسترلىكتەر بويىنشا بولدى: ينۆەستيتسيالار جانە دامۋ مينيسترلىگى - 13,5 ميلليارد تەڭگە؛ ۇلتتىق ەكونوميكا - 5,6 ميلليارد تەڭگە؛ دەنساۋلىق ساقتاۋ جانە الەۋمەتتىك دامۋ - 3,3 ميلليارد تەڭگە؛ ىشكى ىستەر - 3,1 ميلليارد تەڭگە؛ قارجى مينيسترلىگى 1,4 ميلليارد تەڭگە.

اۆتور: قانات مامەتقازى ۇلى