11:04, 07 - ناۋرىز 2016 | GMT +5
جاپونيا پرەمەرى اراعا 38 جىل سالىپ يرانعا بارادى
استانا. قازاقپارات - جاپونيا پرەمەرى سيندزو ابە 38 جىلدا العاش رەت جاپوندىق بيزنەسمەندەر جانە كومپانيالاردىڭ باسشىلارى توبىمەن يرانعا بارادى،
دەپ جازادى دۇيسەنبى كۇنى جاپوندىق «نيككەي» ىسكەرلىك گازەتى.
بۇل 1978 - جىلدىڭ قىركۇيەگىندە جاپونيا پرەمەر- ءمينيسترى تاكەو فۋكۋدانىڭ يرانعا جاساعان ساپارىنان كەيىن يرانعا ءبىرىنشى بارۋ. يرانعا ساپار تامىزدىڭ ەكىنشى جارتىسىندا كەنياعا بارۋمەن بىرىكتىرىلۋى مۇمكىن، دەپ حابارلايدى باسىلىم.
قاڭتار ايىندا جاپونيا يرانعا قارسى سانكسيالاردى جويدى. ال اقپاننىڭ باسىندا جاپوندىق كومپانيالار ءۇشىن يران نارىعىنا جول اشىپ، ولاردىڭ ينۆەستيتسيالارىن يراننىڭ گاز جانە مۇناي شىعارۋ سالاسىنا ىنتالاندىراتىن ينۆەستيتسيالار تۋرالى ەكىجاقتى كەلىسىمگە قول قويدى. ەكى ەلدىڭ بانكتەرى فيليالدار اشىپ، سونىمەن بىرگە ەكى ەلدىڭ قارجىلىق ينستيتۋتتارىنىڭ اراسىندا ۆاليۋتا ايىرباستاۋ كەلىسىمدەرىن ورناتۋ مۇمكىندىگىن الىپ وتىر.
