جەمقورلىق تۋرالى اقپارات بەرگەن قازاقستاندىقتارعا 38 ميلليون تەڭگە تولەنگەن

بۇل تۋرالى «قازاقپارات» ءتىلشىسىنىڭ رەسمي ساۋالىنا جاۋاپ بەرگەن ق ر مەملەكەتتىك قىزمەت ىستەرى جانە سىبايلاس جەمقورلىققا قارسى كۇرەس اگەنتتىگى حابارلادى.
ۆەدومستۆونىڭ رەسمي جاۋابىنداعى دەرەكتەرگە سۇيەنسەك، 2013 - جىلدان باستاپ 2014 - جىلدىڭ تامىزىنا دەيىن 336 ادامعا سىياقى رەتىندە 38 ميلليون تەڭگە تولەنگەن.
«جالپى، قازاقستان بۇرىنعى كەڭەستىك ەلدەردىڭ اراسىندا العاشقىلاردىڭ ءبىرى بولىپ 2012 - جىلى سىبايلاس جەمقورلىق تۋرالى اقپارات بەرگەن ادامعا سىياقى تاعايىندايتىن ينستيتۋتتى ىسكە قوستى. بۇل ينستيتۋت 2013 -جىلدان باستاپ تولىق جۇمىسقا كىرىستى. ينستيتۋتتى قۇرۋ ءۇشىن، ياعني، ونىڭ جۇمىسى ءۇشىن رەسپۋبليكالىق بيۋدجەتتەن جىل سايىن 32 ميلليون تەڭگە بولىنەدى. 2013 - جىلدان باستاپ 2014 - جىلدىڭ تامىزىنا دەيىن سىبايلاس جەمقورلىق تۋرالى اقپارات بەرگەن 336 ادامعا جالپى سوماسى 38 ميلليون تەڭگە كولەمىندە سىياقى بەرىلگەن»، - دەلىنگەن ۆەدومستۆونىڭ رەسمي جاۋابىندا.
قازىر سىبايلاس جەمقورلىقپەن كۇرەس ماسەلەلەرى قايتادان قۇرىلعان مەملەكەتتىك قىزمەت ىستەرى جانە سىبايلاس جەمقورلىققا قارسى كۇرەس جونىندەگى اگەنتتىكتىڭ قۇزىرەتىنە بەرىلگەن. ال، سىبايلاس جەمقورلىق تۋرالى اقپارات بەرگەن ادامداردى ىنتالاندىرۋ جونىندەگى وكىلەتتىلىك «سىبايلاس جەمقورلىققا قارسى ءىس- قيمىل» تۋرالى زاڭعا نەگىزدەلىپ، وسى ورگاننىڭ قاداعالاۋىندا بولادى.
اۆتور: كەنجەكەي توقتامۇرات قىزى