استانادا جاڭا جىلدى مەرەكەلەۋگە وراي 38 شىرشا ورناتىلدى

استانا. قازاقپارات - استانادا جاڭا جىلدى مەرەكەلەۋ اياسىندا 38 شىرشا ورناتىلدى. اتاپ ايتقاندا، الماتى اۋدانىندا - 24, سارىارقا اۋدانىندا - 5 جانە ەسىل اۋدانىندا - 9 شىرشا قويىلدى، دەپ حابارلانعان ەلوردا اكىمدىگىنىڭ رەسمي سايتىندا.

سونىمەن قاتار قالادا شاعىن ساۋلەت مۇسىندەرى قويىلىپ، عيماراتتاردىڭ قاس بەتتەرى بەزەندىرىلدى، يلليۋميناتسيالىق اركالار مەن كرونشتەيندەر ورناتىلدى. كوشەلەردىڭ بويىندا، تۇرعىن جانە اكىمشىلىك عيماراتتاردىڭ قاس بەتتەرى ويىنشىقتارمەن، قار ۇشقىندارىمەن، شارلارمەن ارلەندى.

تۇران داڭعىلى، ورىنبور كوشەسى، قابانباي باتىر داڭعىلى مەن «استانا-بايتەرەك» گۇلزارىنداعى اعاشتار، ق ر ۇكىمەتىنىڭ الدىنداعى جاياۋ جۇرگىنشىلەر كوپىرى، دوڭگەلەك الاڭ ارقىلى وتەتىن كوپىر، ەلوردالىق سيرك الدىنداعى گۇلزار، عاشىقتار ساياباعى جانە اراي ساياباعى بەزەندىرىلدى. ەسىل اۋدانىندا 400 دەن استام شاعىن جانە ورتا بيزنەس سۋبەكتىسى نىساندارىنىڭ قاس بەتتەرىن جاڭا جىلعا وراي راسىمدەدى.

ەسىل وزەنىنىڭ جاعالاۋىندا م. وتەمىس ۇلى اتىنداعى وقۋشىلار سارايىنىڭ جانىندا بالالارعا ارنالعان ەكى سىرعاناق جاسالادى. سونداي-اق كونكي تەبۋدى ۇناتاتىندار ءۇشىن اقبۇلاق وزەنىندە جانە «جەرۇيىق» پاركىندە ءۇش اشىق مۇز ايدىنى، 7 مەكتەپتىڭ اۋماعىندا مەكەمە جانىنداعى كورتتاردا 9 سىرعاناق اشىلادى.

ەسكە سالايىق، جاڭا جىلدى مەرەكەلەۋ اياسىندا ەلىمىزدە 1-4- قاڭتار جانە روجدەستۆو مەيرامى اتالىپ وتىلەتىن 7- قاڭتار دەمالىس كۇندەرى بولىپ جاريالاندى.