ەلىمىزدە 38 مىڭنان استام نۇرسۇلتان تۇرادى
ونىڭ ىشىندە، 95 ادامنىڭ جەكە باس مالىمەتى قازاقستان پرەزيدەنتىنىڭ اتى-جونىمەن تولىق سايكەس كەلەدى.
بۇل تۋرالى "ەكسپرەسس ك" باسىلىمى جازادى.
ۇلتتىق ەكونوميكا مينيسترلىگىنە سىلتەمە جاساعان باسىلىمنىڭ مالىمەتىنشە، رەسپۋبليكامىزدا بۇگىندە 38 مىڭنان استام نۇرسۇلتان تۇرىپ جاتىر.
ونىڭ ىشىندە، 95 ادامنىڭ ەسىمى - نۇرسۇلتان، فاميلياسى - نازاربايەۆ. اتى- ءجونى تۇڭعىش پرەزيدەنتپەن تۇتاس سايكەس كەلەتىن ادامداردىڭ كوبى الماتى جانە وڭتۇستىك قازاقستان وبلىستارىندا - 18 ادامنان.
نازاربايەۆپەن اتتاستاردىڭ 17 سى ماڭعىستاۋ وبلىسىندا، 10 ى اقتوبە وبلىسىندا تۇرادى. جامبىل مەن قىزىلوردا وبلىستارىندا 8 ادام، قاراعاندى وبلىسىندا 4 ادام، شىعىس قازاقستان وبلىسىندا 3 ادام بار. اتىراۋ، باتىس قازاقستان وبلىستارى مەن الماتىدا - 2 اتتاستان.
باسىلىمنىڭ حابارلاۋىنشا، بىلتىر ەلىمىزدە تۇڭعىش پرەزيدەنت كۇنىندە تۋىلعان 744 سابيگە نۇرسۇلتان ەسىمى بەرىلگەن. ال بيىل 1 - جەلتوقسانعا دەيىن-اق 900 دەن استام بالاعا پرەزيدەنتتىڭ اتى قويىلدى.
باسىلىم بيىلعى العاشقى جارتىجىلدىقتا 198 مىڭ ءسابيدىڭ ومىرگە كەلگەنىن جازادى. ساراپشىلار مۇنداي دەموگرافيالىق قارقىنمەن 2014 - جىل تۋۋ كورسەتكىشى جونىنەن تاۋەلسىز قازاقستان تاريحىنداعى رەكوردتى جىل اتانۋى مۇمكىن دەپ ەسەپتەيدى.
دەنساۋلىق ساقتاۋ جانە الەۋمەتتىك دامۋ مينيسترلىگىنىڭ مالىمەتىنشە، ەلىمىزدە كۇن سايىن مىڭنان استام ءسابي دۇنيەگە كەلەدى. استانانىڭ وزىندە تۇڭعىش پرەزيدەنت كۇنى 60 ءسابي تۋىلدى، بۇل - بىلتىرعى وسى كەزەڭدەگى كورسەتكىشتەن 10 سابيگە كوپ.
مامانداردىڭ ايتۋىنشا، مۇنداي تۋۋ كورسەتكىشى ەلىمىزدە سوڭعى رەت شيرەك عاسىر بۇرىن بايقالعان. قازاقستان حالقى بولجانعان مەجەدەن دە قىزۋ قارقىنمەن كوبەيىپ كەلەدى. 90- جىلدارداعى دەموگرافيالىق ەسەپتەۋلەر بويىنشا، 2030 - جىلعا قاراي قازاقستان حالقىنىڭ سانى 20 ميلليون ادامعا جەتەدى.
قازىردىڭ وزىندە ەل حالقىنىڭ سانى - 17 ميلليون ادام. دەموگرافتار ستاتيستيكانىڭ بۇلاي قالىپتاسۋى ەلدەگى تۇراقتىلىقتىڭ بەلگىسى دەپ سانايدى.
tengrinews.kz
