سوڭعى بەس جىلدا 380 نەن استام قازاقستاندىق شەتەلدە تەگىن ەم الدى
بۇل تۋرالى ق ر دەنساۋلىق ساقتاۋ جانە الەۋمەتتىك دامۋ مينيسترلىگىنىڭ باسپا ءسوز قىزمەتىنەن حابارلاندى.
قازاقستاندىقتاردى تەگىن مەديتسينالىق كومەكپەن قامتاماسىز ەتۋ ماقساتىندا 2011-جىلى ق ر دەنساۋلىق ساقتاۋ مينيسترلىگى جانىنان ازاماتتاردى شەت ەلدەرگە ەمدەلۋ ءۇشىن جىبەرۋ جانە ق ر ازاماتتارىن بيۋدجەت قاراجاتى ەسەبىنەن شەت ەلدەرگە ەمدەلۋگە جىبەرۋدىڭ ەرەجەلەرىن بەكىتۋ ماسەلەلەرى جونىندەگى جۇمىس ورگانى قۇرىلعان بولاتىن. قولدانىستاعى ەرەجەلەرگە سايكەس، قازاقستان ازاماتتارىنىڭ ءبىرقاتار ساناتتارىن شەت ەلدەردە ەمدەۋ قاراستىرىلادى.
«2011-جىلى شەتەلگە قازاقستاندىق 78 ناۋقاس (17 ەرەسەك، 61 بالا)، 2012-جىلى - 64 (17 ەرەسەك، 47 بالا)، 2013-جىلى - 64 (18 ەرەسەك، 46 بالا)، 2014-جىلى - 70 (45 ەرەسەك، 25 بالا)، 2015 گودۋ - 57 (30 ەرەسەك، 27 بالا) ەم قابىلداۋ ءۇشىن جىبەرىلدى. اعىمداعى جىلى وڭىرلەردەن ناۋقاستاردى شەت ەلدەردە ەمدەۋگە قاتىستى 176 ۇسىنىم جاسالدى. وسىعان بايلانىستى قازاقستان ازاماتتارىن شەتەلدىك مەديتسينالىق مەكەمەلەرگە جولداۋ جونىندەگى كوميسسيانىڭ 11 وتىرىسى ءوتىپ، 52 پاتسيەنتتى جىبەرۋ ماقۇلدانعان. 12 پاتسيەنتتى ەمدەۋ قازاقستانداعى شەبەرلىك-سىنىپتارى اياسىندا جۇرگىزىلەدى، ال 80 ناۋقاسقا ەم-دوم قازاقستاننىڭ مەديتسينالىق ۇيىمدارىندا جاسالماق. قالعان ۇسىنىم-حاتتار قارالۋ ۇستىندە»، - دەلىنگەن باسپا ءسوز بايانىندا.
ايتا كەتەرلىگى، سوڭعى جىلدارى قازاقستاندىقتارعا جاڭا ءارى قىمبات مەديتسينالىق تەحنولوگيالار شەت ەلدەردە عانا ەمەس ەلىمىزدىڭ ىشىندە دە قولجەتىمدى بولا باستادى. ماسەلەن، 2010-جىلى رەسپۋبليكامىزدا دياگنوستيكا مەن ەمدەۋدىڭ 40 جاڭا تەحنولوگياسى ەنگىزىلگەن. 2015 جىلى بۇلاردىڭ سانى 120 دان استى.
اۆتور: قانات مامەتقازى ۇلى
