شىنجاڭدا تەرروريزم ءۇشىن 380 ادام تۇتقىندالدى

استانا قازاقپارات - شىنجاڭ- ۇيعىر اۆتونوميالىق اۋدانىندا ءبىر اي بويى جۇرگىزىلگەن تەرروريزمگە قارسى وپەراسيا كەزىندە 380 كۇدىكتى تۇتقىندالدى. سونىمەن قاتار، لاڭكەستەردىڭ 32 جاسىرىن بولىمشەسى تالقاندالعان.

مۇنى ۇرىمجىدە وتكەن باسپا ءسوز ءماسليحاتىندا شىنجاڭ ولكەلىك قوعامدىق قاۋىپسىزدىك دەپارتامەنتىنىڭ وكىلدەرى مالىمدەدى.

بۇعان قوسا، ولاردىڭ سوزىنە قاراعاندا، ناۋقان بارىسىندا بومبا جاساۋعا قاجەتتى 3 توننادان ارتىق ماتەريال، 100 شاقتى كومپيۋتەر جانە 365 پىشاق تاركىلەنگەن.

 ايتا كەتسەك، شىنجاڭدا ءارتۇرلى شابۋىلدار جيىلەپ، بىلتىردان بەرى 200 دەي ادام قازا تاپتى. قىتاي ۇكىمەتىنىڭ ويىنشا، تەراكتىلەردى تاۋەلسىز شىعىس تۇركىستان مەملەكەتىن قۇرۋدى كوزدەگەن يسلامشىل سەپاراتيستەر ۇيىمداستىرىپ وتىر.

 الايدا، ادام قۇقىعىن قورعاۋ ۇيىمدارىنىڭ مالىمەتىنشە، شىنجاڭدا شابۋىلداردىڭ كوبەيۋىنە بەيجىڭنىڭ رەپرەسسيالىق ساياساتى سەبەپ. قىتاي بيلىگى بولسا، وزىنە تاعىلعان مۇنداي كىنانى مويىنداماي وتىر.

 ارىستان رىسبەك

 «قازاقستان» تەلەارناسى