دەمالىس كۇندەرى ەلىمىزدىڭ باسىم بولىگىندە 37 گرادۋسقا دەيىن ىستىق بولادى

نۇر-سۇلتان. قازاقپارات - قازگيدرومەت الداعى دەمالىس كۇندەرگە ارنالعان اۋا رايى بولجامىن جاريالادى، دەپ حابارلايدى قازاقپارات.

الداعى كۇندەرى، قازاقستاننىڭ باتىسى مەن سولتۇستىك- باتىسىندا جاۋىن- شاشىنسىز اۋا رايى كۇتىلەدى. ەلدىڭ قالعان بولىگىندە ۇزاق ۋاقىت بويى اۋا- رايىن، وڭتۇستىك تسيكلون جانە ونىمەن بايلانىستى اتموسفەرالىق فرونتالدى بولىمدەر انىقتايدى.

مۇندا جاڭبىرلى اۋا رايى بولجانادى. نايزاعاي، ەكپىندى جەلمەن قىسقا مەرزىمدى جاڭبىر جاۋادى. رەسپۋبليكانىڭ ورتالىعىندا، سولتۇستىگىندە، وڭتۇستىگىندە جانە وڭتۇستىك- شىعىسىندا قاتتى جاڭبىر، بۇرشاق، قاتتى جەل بولۋى مۇمكىن.

تەمپەراتۋرالىق فون ەرەكشە وزگەرىستەرگە ۇشىرامايدى. كۇندىز باتىستا +30 +37، وڭتۇستىك- باتىستا +27 +37، سولتۇستىك- باتىستا +27 +35، سولتۇستىكتە، شىعىستا +22 +30، ورتالىقتا +20 +28، وڭتۇستىكتە، وڭتۇستىك- باتىستا، ەلدىڭ شىعىسىندا +30 +35 سەلسي گرادۋس، ال تاۋلى ايماقتاردا +25 سەلسي گرادۋس شاماسىندا ىستىق بولجانادى.