استانادا تۇرعىن ۇيلەردى زاڭسىز ساتۋدىڭ 37 ارەكەتى انىقتالدى - اكىم

 «قالادا زاڭدى اينالىپ، حالىقتى الداعان قۇرىلىس كومپانيالارى تۋرالى جەكە توقتالعىم كەلەدى. بۇل زالدا وسى ساۋالمەن كەلگەن ازاماتتار از ەمەس شىعار. بىلتىر قۇرىلىس بويىنشا 909 زاڭ بۇزۋشىلىق تىركەلدى. تۇرعىن ءۇيدى زاڭسىز ساتۋدىڭ 37 ارەكەتى انىقتالدى. وسپادارسىز قۇرىلىس كومپانيالاردىڭ اتتارىن بارلىعى بىلەدى. بۇل - «ازبۋكا جيليا»، «باراقات»، «تولەندى» جانە وزگە دە كومپانيالار. بارلىق ءتىزىم اكىمدىك سايتىندا بار. بارلىعىنا زاڭدى شارالار قابىلدانادى. ۇكىمەتكە ۇلەسكەرلىك قۇرىلىس سالاسىن قاداعالاۋ شارالارىن كۇشەيتۋ بويىنشا ناقتى ۇسىنىستار ەنگىزىلدى»، - دەپ اتاپ ءوتتى استانا اكىمى.

ءا. جاقسىبەكوۆتىڭ ايتۋىنشا، الدانىپ قالعان ۇلەسكەرلەرگە قالا بيلىگى كومەكتەسەتىن بولادى.

«قالادا نىسانداردىڭ قۇرىلىسى اياقتالماۋى، ازاماتتارىمىزدىڭ سوڭعى اقشاسىنان ايىرىلىپ، باسپاناسىز قالۋى ءبىزدى الاڭداتادى. ءبىراق ولاردىڭ بارلىعى ۇلەسكەرلىك قۇرىلىستا قاۋىپ- قاتەرلەر بارىن ءبىلدى. مەردىگەردى تاڭداعان وزدەرى. ءبىز ولارعا كوپ مارتە ەسكەرتتىك، ءبىراق حالىقتىڭ دەنى جالعان ۋادە مەن جارناما سوڭىنان ەرىپ، ارزان باعاعا ەلىتىپ، ناقتى فاكتورلاردى ەسكەرمەستەن اقشا سالدى. كەيىن الدانىپ قالعانىن بىلگەندە، ونى زاڭ ارقىلى شەشۋدىڭ ورنىنا، تىكەلەي اكىمدىككە جۇگىرىپ كەلەدى. ءبىراق ولاردى قۇرىلىس كومپانيالارىمەن كەلىسىمشارت جاساۋعا ەشكىم يتەرمەلەگەن ەمەس. وسىنىڭ بارلىعى وزدەرىنىڭ كەلىسىمەن جاسالدى. الايدا ءبىز بۇل ماسەلەگە كەلگەندە سىرت اينالمايىق دەپ شەشتىك. ادامدارعا كومەكتەسۋگە تىرىسامىز. ءاربىر تۇيتكىل بويىنشا ناقتى شەشىمدەر جاسالىپ وتىر»، - دەدى ءا. جاقسىبەكوۆ.

 اۆتور: جاسۇلان جولدىبايەۆ