پيكاسسونىڭ جوعالعان كارتيناسى 37 دوللارعا باعالاندى

استانا. قازاقپارات - نيۋ-يورك قالاسىندا يسپان سۋرەتشىسى پابلو پيكاسسونىڭ «شاشتاراز ايەل» كارتيناسىنىڭ ءتۇپ نۇسقاسى تابىلدى. بۇل كارتينا 2001-جىلى پاريجدەگى پومپيدۋ ورتالىعىنان جۇمباق جاعدايدا ۇرلانعان، دەپ حابارلايدى اقپارات اگەنتتىكتەرى.

امەريكاندىق كەدەنشىلەر كارتينانى 2014-جىلدىڭ جەلتوقسان ايىندا كەزدەيسوق جاعدايدا انىقتاعان. ول نيۋ-يورككە بەلگيادان سالەم-ساۋقاتپەن جىبەرىلدى. جىبەرۋشى وراماعا ونىڭ نەبارى 37 دوللار تۇراتىن ونەر زاتى بولىپ تابىلاتىنىن جازعان. كارتينانىڭ جىبەرىلۋىنە قاتىستى ادامنىڭ قاماۋعا الىنۋى تۋرالى اقپارات جوق.

پيكاسسو «شاشتاراز ايەل» كارتيناسىن 1911-جىلى جازعان، قازىرگى كەزدە ساراپشىلار ونى ميلليونداعان دوللارعا باعالاۋدا. سۋرەتتىڭ كوپ ۇزاماي فرانسياعا ورالاتىنى كۇتىلىپ وتىر.

پابلو پيكاسسو الەمدەگى ەڭ قىمبات سۋرەتشى بولىپ تانىلعانىن اتاپ وتەيىك. ايتالىق، 2008-جىلى ونىڭ جۇمىستارىنىڭ تەك رەسمي ساتىلىمدارىنىڭ باعاسى 262 ميلليون دوللاردى قۇرادى.