وزبەكستاندا 372 مەكتەپتە قازاق ءتىلى وقىتىلادى

استانا. قازاقپارات - وڭتۇستىك قازاقستان وبلىسىنداعى 1038 مەكتەپتىڭ 136-دا وزبەك جانە تاجىك تىلدەرى وقىتىلادى. دەمەك وقۋشىلار مەملەكەتتىك تىلدەن بولەك ورىس، اعىلشىن جانە ءوز انا تىلدەرىندە ءبىلىم الادى.

بۇل جان- جاقتى دامىعان، باسەكەگە قابىلەتتى، بىرنەشە ءتىلدى ەركىن مەڭگەرگەن ساۋاتتى تۇلعانى قالىپتاستىرۋعا مۇمكىندىك بەرەدى. الايدا مۇنداي ءبىلىم بەرۋ جۇيەسى پەداگوگيكالىق كادرلاردى دايارلاۋدا قاتاڭ تالاپتى قاجەت ەتەدى. سەبەبى، ولار ۇنەمى ءوز بىلىمدەرىن جەتىلدىرىپ، وقۋ ۇدەرىسىنە وزىق وقىتۋدىڭ ادىستەرىن ەنگىزىپ وتىرۋى كەرەك. وسىعان بايلانىستى شىمكەنتتە وزبەكستاننىڭ قازاقستانداعى جىلى اياسىندا حالىقارالىق عىلىمي- تاجىريبەلىك كونفەرەنتسيا ءوتتى. وعان ەلىمىزدەن بولەك وزبەكستان مەن تاجىكستاننان 300-گە جۋىق بولاشاق مۇعالىمدەر مەن ءبىلىم سالاسىنىڭ ماماندارى قاتىستى. ولار كوپءتىلدى وقىتۋ جاعدايىنداعى انا ءتىلىن جەتىلدىرۋ ماسەلەلەرىن تالقىلادى.

 رايحان ەسىمحانوۆا، وبلىستىق ادىسكەرلىك كابينەتى ديرەكتورىنىڭ ورىنباسارى:

 - وزگە ۇلتتىڭ ءتىلىن ءبىلۋ ارقىلى سول ۇلتتىڭ مادەنيەتىن تاني باستايدى. الەم مادەنيەتىن تانۋ ارقىلى بالانىڭ بويىندا ءوز وتانىنا دەگەن سۇيىسپەنشىلىك، ازاماتتىق پاتريوتيزم قالىپتاسادى.

وسەرباي بايقابىلوۆ، كونفەرەنتسيا قاتىسۋشىسى /وزبەكستان/:

- وزبەكستاندا 372 مەكتەپتە قازاق ءتىلى وقىتىلادى. وقۋشىلار 1 سىنىپتان 11 سىنىپقا دەيىن ءوز انا تىلىندە ءبىلىم الۋ قۇقىعىنا يە. ياعني ايتايىن دەگەنىم، بۇدان كەيىندە ەكى ەلدىڭ ىنتىماق- بىرلىگى، دوستىعى ارتا بەرسىن. وسىنداي ءبىلىم- عىلىم سالاسىندا تاجىريبەمىز مولايا ءتۇسسىن.

www.24.kz