قاڭتار قاسىرەتى: وسى اپتادا كۇزەتپەن ۇستاۋدان 36 ادام بوساتىلدى
بۇل تۋرالى ق ر ءى ءى م تەرگەۋ دەپارتامەنتىنىڭ باستىعى سانجار ءادىلوۆ ايتتى، دەپ حابارلايدى قازاقپارات ءتىلشىسى.
«ۇلتتىق الدىن الۋ تەتىگى مەن قوعامدىق باقىلاۋ كوميسسيالارىنىڭ وكىلدەرى بارلىق ارنايى مەكەمەلەرگە كەدەرگىسىز كىردى. مەكەمەلەردىڭ بارلىق تۇرعىن، كوممۋنالدىق-تۇرمىستىق ءۇي-جايلارى قوعامدىق وكىلدەردىڭ قاتىسۋىمەن كوميسسيالىق تەكسەرىستەن وتكىزىلۋدە. تەرگەۋ يزولياتورلارىنا تۇسەتىن ادامدار مىندەتتى تۇردە مەديتسينالىق قاراۋدان وتەدى. دەنە جاراقاتتارى انىقتالعان جاعدايدا بەينەتۇسىرىلىم جاسالىپ، جەدەل مەديتسينالىق كومەك كورسەتىلەدى. ونداي ءاربىر فاكتى تۋرالى پروكۋراتۋرا ورگاندارىنا حابارلانادى. مەكەمە جاعدايىندا بىلىكتى مەديتسينالىق كومەك كورسەتۋ مۇمكىن بولماعاندا ولار ازاماتتىق دەنساۋلىق ساقتاۋ مەكەمەلەرىنە جەتكىزىلەدى جانە ارنايى كۇزەتىلەتىن پالاتالاردا ەم قابىلدايدى»، - دەدى ول ورتالىق كوممۋنيكاتسيالار قىزمەتىندەگى بريفينگ بارىسىندا.
ونىڭ اتاپ وتۋىنشە، بارلىق تەرگەۋ ارەكەتتەرى ارنايى جابدىقتالعان بەينەباقىلاۋ كامەرالارى ورناتىلعان ءۇي-جايلاردا جۇرگىزىلەدى. سونداي-اق پروكۋراتۋرا ورگاندارى زاڭدىلىقتىڭ ساقتالۋىنا ۇنەمى قاداعالاپ وتىرادى.
«جەكە باسى مەن قىلمىستىڭ اۋىرلىعىن ەسكەرە وتىرىپ، ىشكى ىستەر ورگاندارى باستاماشىلىعىمەن 103 ادام قاماۋدان بوساتىلدى. ولارعا قاتىستى قوعامنان وقشاۋلاۋمەن بايلانىستى ەمەس بۇلتارتپاۋ شارالارى قولدانىلدى. تەك وسى اپتانىڭ باسىنان بەرى كۇزەتپەن ۇستاۋدان 36 ادام بوساتىلدى. بۇرىن حابارلانعانداي، وسى نەگىزدەر بويىنشا ۋاقىتشا ۇستاۋ يزولياتورىنا كىرگىزبەي 200 دەن استام كۇدىكتىگە قاتىستى بۇلتارتپاۋ شارالارىنىڭ وزگە تۇرلەرى قابىلداندى»، - دەدى سانجار ءادىلوۆ.
