ەلىمىزدە 36 مىڭنان استام مادەنيەت جانە ونەر قىزمەتكەرىنىڭ جالاقىسى ءوستى
بۇل تۋرالى ەلوردادا ءوتىپ جاتقان مادەنيەت جانە سپورت مينيسترلىگىنىڭ القا ماجىلىسىندە مينيستر اقتوتى رايىمقۇلوۆا ءمالىم ەتتى، دەپ حابارلايدى قازاقپارات ءتىلشىسى.
«مادەنيەت جانە سپورت قىزمەتكەرلەرىنىڭ ءال- اۋقاتىن ارتتىرۋ - ءبىزدىڭ جۇمىسىمىزدىڭ ماڭىزدى اسپەكتىلەرىنىڭ ءبىرى. مەملەكەت باسشىسىنىڭ جولداۋىن ىسكە اسىرۋ شەڭبەرىندە 2020 -جىلدىڭ 1 - قاڭتارىنان باستاپ مادەنيەت جانە ونەر ۇيىمدارى قىزمەتكەرلەرىنىڭ جالاقىسى رەسپۋبليكالىق دەڭگەيدە 50 پايىزعا دەيىن، وڭىرلەردە 35 پايىزعا دەيىن ءوستى. جالپى، شامامەن 36,4 مىڭ ادامنىڭ، ونىڭ ىشىندە رەسپۋبليكالىق دەڭگەيدە 3 مىڭعا جۋىق، وڭىرلەردە 31 مىڭنان استام ادامنىڭ جالاقىسى ءوستى» ، - دەدى اقتوتى رايىمقۇلوۆا.
ءمينيستردىڭ ايتۋىنشا، 2020 -جىلدىڭ 1 - قاڭتارىنان باستاپ دەنە شىنىقتىرۋ جانە سپورت سالاسى قىزمەتكەرلەرىنىڭ جالاقىسى جىل سايىن 2023 -جىلعا دەيىن 25 پايىزعا ۇلعايادى (2020 -جىلى - 25 پايىز، 2021 -جىلى - 50 پايىز، 2022 -جىلى-75 پايىز، 2023 -جىلى-100 پايىزعا) .
«نەگىزىنەن جاتتىقتىرۋشى- وقىتۋشىلاردىڭ، مۇعالىمدەردىڭ، 4 مەكتەپ- ينتەرنات- كوللەدجدەرى مەن سپورت كوللەدجى تاربيەشىلەرىنىڭ، بالالار- جاسوسپىرىمدەر سپورت مەكتەبىنىڭ جاتتىقتىرۋشى- وقىتۋشىلارىنىڭ جالاقىسى كوتەرىلەدى. بۇدان باسقا سپورتشىلاردىڭ دوپينگكە قارسى زەرتحاناسىنىڭ، ۇلتتىق دوپينگكە قارسى ورتالىقتىڭ قىزمەتكەرلەرىنە، دەنە شىنىقتىرۋ جانە سپورت جونىندەگى رەسپۋبليكالىق وقۋ- ادىستەمەلىك جانە تالداۋ ورتالىعىنىڭ قىزمەتكەرلەرىنە، سپورتتى دامىتۋ ديرەكتسياسىنىڭ قىزمەتكەرلەرى مەن جاتتىقتىرۋشىلارىنا لاۋازىمدىق جالاقىنىڭ 100 پايىز مولشەرىندە جاڭا قوسىمشا اقىلار بەلگىلەندى. وسىلايشا، ولاردىڭ جالاقىسى 2 ەسە ءوستى» ، - دەدى ول.
