قوستانايدا جىل اياعىنا دەيىن 36 مىڭ كولىك شىعارىلادى
وبلىستا ماشينا جاساۋ كولەمىن ارتتىرۋ جالعاسۋدا. بۇعان دەيىن مۇندا مامانداندىرىلعان اۋىل شارۋاشىلىعى تەحنيكاسى مەن كومباين عانا شىعارىپ كەلگەن. ال 2010 -جىلدان باستاپ جاڭا سالا - اۆتوموبيل جاساۋ سەحى قۇرىلدى. بۇگىندە قوستانايلىق «سارى ارقا اۆتوپروم» ج ش س 9 ءتۇرلى
(Peugeot, Iveco, Hyundai, JAC, Chevrolet Niva, Ravon, MAN, Ankai) اۆتوكولىكتىڭ 50-دەن استام مودەلىن وندىرگەن. كولىكتەر ۇساق جانە ءىرى توراپتىق قۇراستىرۋ ادىسىمەن شىعارىلىپ كەلەدى.
«بۇل رەتتە ماشينا قۇراستىرۋدا جەرگىلىكتى قامتۋ ۇلەسىنىڭ % 38,2 - عا جەتكەنى ءبىز ءۇشىن جەتىستىك. قازىرگى ۋاقىتتا قوستاناي الاڭىندا 47 مىڭعا جۋىق اۆتوموبيل ءوندىرىلدى. ونىڭ ىشىندە 2018 -جىلى 12 مىڭنان استام جەڭىل كولىك شىقسا، وسى جىلدىڭ 4 ايىندا 5,3 مىڭ كولىك ساتىلىمعا قويىلدى. جوسپار بويىنشا جىل سوڭىنا دەيىن شامامەن 36 مىڭ اۆتوموبيل شىعارۋ جوسپارلانعان»، - دەدى ەرلان قويشىبايەۆ ءوز بايانداماسىندا.
وسى جىلدىڭ مامىر ايىندا قوستاناي اكىمدىگى قىتايلىق سمس جانە JAC كومپانيالارىمەن كەلىسىمشارت جاساستى. ناتيجەسىندە، تاياۋ 10 جىلدا شەتەلدىك ارىپتەستەرمەن بىرىگىپ، ماشينا قۇراستىرۋ سالاسىنا 1,1 ميلليارد ا ق ش دوللارى سوماسىندا ينۆەستيتسيا قۇيىلادى.
وبلىس اكىمى ارحيمەد مۇحامبەتوۆ كاسىپورىنعا ءوندىرىس كولەمىن ارتتىرۋدى تاپسىردى. ونىڭ ايتۋىنشا، كاسىپورىن جىلىنا 100 مىڭ بىرلىككە دەيىن شىعارۋعا قاۋقارلى. سونداي- اق، اۆتوموبيلدەردىڭ مودەلدىك قاتارىن كەڭەيتۋ دە ماڭىزدى مەجە سانالادى.
كولىك لوگيستيكاسىنىڭ دامۋى رەسەي، تاجىكستان، قىرعىزستان، بەلارۋس سياقتى ەلدەرگە ءونىم جەتكىزۋ ۇلەسىن ارتتىرادى. 2018 -جىلى ەكسپورتقا جالپى سوماسى 1,2 ميلليارد تەڭگەگە 291 اۆتوكولىك ساتىلعان. بيىلعى قاڭتار- ءساۋىر ايلارىندا كاسىپورىن 287 كولىكتى شەتەل اسىرعان. ناتيجەسىندە 1,1 ميلليارد تەڭگە پايدا ءتۇستى.
اۆتور: قاسقىرباي قويشىمانوۆ