شىمكەنتتىك 36 ميلليارد تەڭگەنى جىمقىرعان «ناۋقاس» كاسىپكەرلەر سوتتالدى

شىمكەنت. قازاقپارات - شىمكەنتتە جالعان كاسىپكەرلىكپەن اينالىسقان قىلمىستىق توپتىڭ مۇشەلەرى سوتتالدى.

ۇيىمداسقان توپقا سالىقتان جالتارىپ، 36 ميلليارد تەڭگەنى جىمقىردى دەگەن ايىپتار تاعىلدى، دەپ حابارلايدى قازاقپارات ءتىلشىسى.

سوت وتىرىسىندا بەلگىلى بولعانداي، جەتى ادامنان قۇرالعان توپتىڭ مۇشەلەرى 2010 -جىلدان بەرى 16 جاۋاپكەرشىلىگى شەكتەۋلى سەرىكتەستىك اشقان. جالعان كاسىپكەرلىكپەن اينالىسقاندار جەڭىل اقشامەن قالتالارىن قالىڭداتىپ جۇرگەنى انىقتالدى.

ءتىپتى سەرىكتەستىكتەردى مۇمكىندىگى شەكتەۋلى نەمەسە اۋىر ناۋقاس ادامداردىڭ اتىنا اشىپ، سالىقتان جالتارۋدىڭ جولىن تاپقان. قارجىلىق قۇيتىرقىلاردى وبلىستىق مەملەكەتتىك كىرىستەر دەپارتامەنتى ەكونوميكالىق تەرگەۋ باسقارماسىنىڭ قىزمەتكەرلەرى اشكەرەلەدى. ولارعا قاتىستى 44 قىلمىستىق ءىس قوزعالعان.

ءال-فارابي اۋداندىق سوتى ايىپتالۋشىلاردى قىلمىستىق كودەكستىڭ 262، 245، 218، 238 جانە 240-باپتارى بويىنشا كىنالى دەپ تانىپ، ۇكىم شىعاردى. ايىپتالۋشىلاردىڭ الدى التى جارىم جىلدان ون جىلعا دەيىن باس بوستاندىقتان ايىرۋ جازاسىنا كەسىلدى. ال قىلمىستىق توپتىڭ جەتەكشىسى 10 جىلعا تۇرمەگە جابىلدى.