سولتۇستىك كورەيا 36 جىلدا العاش رەت پارتيا سەزىن شاقىرۋدى ۇيعاردى
«بۇگىندە ءبىز ءوزىمىزدىڭ قاسيەتتى مىندەتتەرىمىز - گۇلدەنگەن سوتسياليستىك ۇلت قۇرىلىسىندا ۇلكەن ورلەۋگە جانە پارتيانى ودان ءارى نىعايتۋعا قول جەتكىزۋدە قيىندىقتارعا كەزدەسىپ وتىرمىز»، - دەلىنگەن ساياسي بيۋرونىڭ شەشىمىندە.
سەزد كەلەسى جىلدىڭ مامىر ايىندا وتەدى. سەزدىڭ كۇن ءتارتىبى ازىرگە جاريالانعان جوق. الايدا ساراپشىلار وندا ەل ءۇشىن ماڭىزدى شەشىمدەر قابىلداناتىنىن ايتادى. كيودو اگەنتتىگىنىڭ مالىمەتتەرى بويىنشا، سەزد پارتيانىڭ 70 جىلدىعىنا وراي شاقىرىلۋى مۇمكىن، ونىڭ سالتاناتتى شارالارى بيىلعى جىلعى قازان ايىندا ءوتتى. اگەنتتىكتىڭ پايىمداۋىنشا، ەل باسشىلىعىنداعى پارتيانىڭ ءرولى كۇشەيتىلىپ، قوعامدى نىعايتۋدىڭ جاڭا باعىتى ۇسىنىلۋى مۇمكىن.
كورەيا ەڭبەك پارتياسىنىڭ سوڭعى سەزى 1980-جىلى ءوتتى - وندا كيم ير سەن كيم چەن ءيردى رەسمي تۇردە ءوزىنىڭ مۇراگەرى ەتىپ جاريالادى. ەلدىڭ قازىرگى كوشباسشىسى كيم چەن ىن سەزگە العاش رەت قاتىسادى.
كورەيا تۇبەگى ءالى دە سوعىس جاعدايىندا دەپ سانالادى، ويتكەنى، 1950-1953-جىلدارداعى سوعىستان كەيىن بەيبىت شارتقا ەمەس، تاتۋلاسۋ تۋرالى قۇجاتقا عانا قول قويىلدى. ك ح د ر مەن وڭتۇستىك كورەيا شەكاراسىندا ءالى كۇنگە دەيىن ۇنەمى جانجالدار بولىپ تۇرادى.
