استانادا باسپانا كەزەگىندە 36 مىڭنان استام ازامات تۇر

بۇل تۋرالى بۇگىن استانا اكىمىنىڭ ورىنباسارى اندرەي لۋكين ءمالىم ەتتى.

«جىل سايىن ەلورداعا جۇزدەگەن جاس وتباسىلار قونىس اۋدارىپ جاتىر. ولاردىڭ قاتارىندا ەل وبلىستارىنان عانا ەمەس، سونىمەن قاتار شەتەلدەن كەلگەندەر دە بار. سوعان بايلانىستى استانادا جاڭا ءارى ساپالى باسپانا سالۋ ماسەلەسى وزەكتى. قالا دامىعان سايىن ونىڭ حالقى دا كوبەيە بەرەتىندىگى ءمالىم. سوندىقتان الەۋمەتتىك تۇرعىن ۇيلەردى سالۋدىڭ ماڭىزى دا جوعارى. قازىرگى ۋاقىتتا استانادا مەملەكەتتىك قوردان باسپانا الۋ كەزەگىندە تۇرعانداردىڭ سانى 36 مىڭعا جەتىپ وتىر»، - دەدى لۋكين.

ونىڭ ايتۋىنشا، وسى تۇرعىدا جالعا بەرىلەتىن الەۋمەتتىك تۇرعىن ءۇي سالۋ باعدارلاماسى قولعا الىنعان.

«باسپاناعا ءزارۋ ازاماتتاردىڭ نەگىزگى بولىگى - جاس وتباسىلار، مۇگەدەك نەمەسە اتا- اناسى جوق بالالاردى اسىراپ جاتقان وتباسىلار، تولىق ەمەس جانۇيالار جانە تاعى باسقالارى. سوندىقتان ەڭ ءتيىمدىسى - وسى ارەندالىق پاتەرلەردىڭ قۇرىلىسى. سوندىقتان استانا قالاسى اكىمدىگى، «بايتەرەك» باسقارۋشى حولدينگى مەن «قازاقستاننىڭ يپوتەكالىق كومپانياسى» ءتيىستى جۇمىستاردى اتقارۋدا. ۇلتتىق قوردان رەسپۋبليكا بويىنشا 180 ميلليارد تەڭگە ءبولىندى»، - دەپ اتاپ ءوتتى ول.

180 ميلليارد تەڭگەنىڭ 35 ميلليارد تەڭگەسى جەرگىلىكتى اتقارۋشى ورگاندارعا ارنالعان. ولار بۇل قارجىنى قاجەتتى ينفراقۇرىلىمدى جاساقتاۋعا جۇمساۋى ءتيىس. «بايتەرەك» حولدينگىنە جالعا بەرىلەتىن ۇيلەر سالىپ، ولاردى ساتىپ الۋعا 145 ميلليارد تەڭگە ءبولىندى. بۇل قارجىنىڭ 92,5 ميلليارد تەڭگەسى 2015 -جىلى، قالعان 52,5 ميلليارد تەڭگەسى 2016 -جىلى يگەرىلۋى ءتيىس.

اۆتور: جاسۇلان جولدىبايەۆ