ەلدەگى 3679 مەكتەپتىڭ دابىل قوندىرعىسى پوليتسيا بولىمشەلەرىنە جالعاندى
بۇل تۋرالى ق ر ىشكى ىستەر مينيسترلىگى اقپاراتتاندىرۋ جانە بايلانىس دەپارتامەنتىنىڭ باس مامانى ءادىل سارسەنوۆ ۆەدومستۆونىڭ ونلاين بريفينگىندە ءمالىم ەتتى، دەپ حابارلايدى قازاقپارات ءتىلشىسى.
«جالپى، بالالاردىڭ قاۋىپسىزدىگىن قامتاماسىز ەتۋ ماسەلەسى مەملەكەت باسشىسى مەن قر ۇكىمەتىنىڭ قاتاڭ باقىلاۋىندا. ۇكىمەتتىڭ ءبىرقاتار وتىرىستارىندا اتالعان پروبلەما قارالدى. وسى كەڭەستەردىڭ قورىتىندىسى بويىنشا ءىرى قالالاردا ورنالاسقان ءبىلىم بەرۋ ۇيىمدارىنىڭ بەينەباقىلاۋ جۇيەلەرىن جاراقتاندىرۋ بويىنشا بەلسەندى جۇمىس ءجۇرىپ جاتىر. بۇگىنگى تاڭدا بۇكىل 7370 ءبىلىم بەرۋ ۇيىمى بەينەباقىلاۋ جۇيەسىمەن جابدىقتالعان، ونىڭ 40 پايىزى ءىرى قالالاردا ورنالاسقان»، - دەيدى ءادىل سارسەنوۆ.
ايتۋىنشا، مەكتەپتەردەن كەلىپ تۇسكەن بەينە دەرەكتەردى جەدەل باسقارۋ ورتالىقتارى مەن ىشكى ىستەر ورگاندارىنىڭ كەزەكشى بولىمدەرى ۇنەمى نازاردا ۇستايدى.
«قازىرگى ۋاقىتتا بارلىق ءبىلىم بەرۋ ۇيىمدارىنىڭ اۋماعىنداعى وبەكتىلەردىڭ سىرتقى جانە ىشكى بەينەباقىلاۋ كامەرالارىن اۋماقتىق پوليتسيا بولىمدەرىنىڭ جەدەل باسقارۋ ورتالىعىنا قوسۋ بويىنشا جۇمىس جالعاسۋدا. سونىمەن قاتار، وبلىس ورتالىقتارى مەن ءىرى قالالاردىڭ مەكتەپتەرى «SOS» باتىرماسىمەن جابدىقتالعان. ولاردى مامانداندىرىلعان كۇزەت قىزمەتىنە جانە ىشكى ىستەر ورگاندارىنا قوسۋ بويىنشا جۇمىستار ءجۇرىپ جاتىر. سوڭعى مالىمەت بويىنشا، مامانداندىرىلعان كۇزەت قىزمەتىنە مەكتەپ عيماراتىنىڭ 4418 جانە پوليتسياعا - 3679 دابىل قوندىرعىسى قوسىلعان»، - دەدى ءى ءى م وكىلى.
