اتىراۋ پروكۋرورلارى 365 كاسىپكەردىڭ قۇقىعىن قورعاپ، 11 ميلليون تەڭگەسىن قايتاردى

اتىراۋ. قازاقپارات - اتىراۋ پروكۋرورلارى 365 كاسىپكەردىڭ قۇقىعىن قورعاپ، 11 ميلليون تەڭگەسىن قايتاردى، دەپ حابارلايدى قازاقپارات ءتىلشىسى.
None

اتىراۋ وبلىستىق پروكۋراتۋراسىنىڭ باسپا ءسوز قىزمەتىنەن ءمالىم ەتكەندەي، پروكۋرورلىق قاداعالاۋدىڭ باعىتى - كاسىپكەرلەردىڭ قۇقىقتارىن قورعاۋ.

«بيىلعى جىل باسىنان اتىراۋ قالاسىنىڭ پروكۋراتۋراسى 365 كاسىپكەردىڭ قۇقىعىن قورعاپ، جەرگىلىكتى اتقارۋشى ورگاننان 11 ميلليون تەڭگەسىن كەرى قايتاردى. ماسەلەن، پروكۋرورلىق قاداعالاۋ اكتىسى نەگىزىندە مەملەكەتتىك كىرىس ورگانى 269 كاسىپكەرگە قاتىستى شىعارىلعان بانكتىك شوتتاردى توقتاتۋ تۋرالى زاڭسىز بۇيرىقتاردىڭ كۇشىن جويدى»، - دەپ حابارلادى پروكۋراتۋرانىڭ باسپا ءسوز قىزمەتى.

سونداي-اق، كاسىپكەرلەردىڭ بانكتىك شوتتارىنان شىعىس وپەراتسيالارىن نەگىزسىز توقتاتۋ دەرەگى انىقتالعان. سونىڭ ناتيجەسىندە تاعى 4 كاسىپكەردىڭ قۇقىعى قالپىنا كەلتىرىلگەن.

«سالىق ورگاندارىمەن «Wipon» قوسىمشاسى ارقىلى الىنعان حابارلامالار نەگىزىندە تاعايىندالعان 51 زاڭسىز تەكسەرىستىڭ كۇشى جويىلدى. جالپى تەكسەرۋلەر تەك جەكە جانە زاڭدى تۇلعالاردىڭ ارىزى نەگىزىندە جۇزەگە اسىرىلاتىنى نازاردان تىس قالعان. كىنالى تۇلعالار تارتىپتىك جاۋاپقا تارتىلدى»، - دەپ ءمالىم ەتتى باسپا ءسوز قىزمەتىنەن.

ەسكە سالا كەتەلىك، بۇدان بۇرىن اتىراۋ وبلىسىندا 180 جۇمىسشىعا 32 ميلليون تەڭگەنىڭ جالاقى بەرەشەگى وتەلگەنىن حابارلاعان بولاتىنبىز.

اتىراۋ وبلىسىنىڭ پروكۋرورى باۋىرجان جۇماقانوۆتىڭ مالىمەتىنشە، بيىلعى 6 ايدا 58 مىڭنان استام ازاماتتىڭ، ونىڭ ىشىندە 18 مىڭ بالانىڭ، 4,2 مىڭ كاسىپكەردىڭ قۇقىعى قورعالعان.

پروكۋرورلىق دەن قويۋ شارالارى ارقىلى مەملەكەتكە 489 ميلليون تەڭگە زالال وتەلىپ، 6,1 ميلليارد تەڭگەنىڭ مۇلكى قايتارىلدى. پروكۋروراتۋرا ورگاندارىنىڭ ۇيلەستىرۋىمەن 180 جۇمىسشىعا 32 ميلليون تەڭگەنىڭ جالاقى بەرەشەگى وتەلگەن.

سوڭعى جاڭالىقتار