قۇقىق قورعاۋ ورگاندارىنىڭ زاڭسىز ارەكەتتەرىنە قاتىستى 363 شاعىم ءتۇستى

نۇر-سۇلتان. قازاقپارات - بۇگىن ورتالىق كوممۋنيكاتسيالار قىزمەتىندە ق ر باس پروكۋراتۋراسى 1-قىزمەت باستىعىنىڭ ورىنباسارى ەلدوس قيلىمجانوۆ قۇقىق قورعاۋ ورگاندارىنىڭ زاڭسىز ارەكەتتەرىنە قاتىستى وتىنىشتەر تەكسەرىلىپ جاتقانىن ايتتى، دەپ حابارلايدى قازاقپارات ءتىلشىسى.

«قۇقىق قورعاۋ ورگاندارىنىڭ زاڭسىز ارەكەتتەرىنە قاتىستى وتىنىشتەردى تەكسەرۋگە ەرەكشە كوڭىل ءبولىنىپ وتىر. قازىرگى ۋاقىتتا پروكۋراتۋراعا وسىنداي 363 شاعىم ءتۇستى. سىبايلاس جەمقورلىققا قارسى قىزمەتىنىڭ قاراۋىندا تەرگەۋدىڭ رۇقسات ەتىلمەگەن ادىستەرى تۋرالى 178 قىلمىستىق ءىس بار. ارنايى پروكۋرورلارمەن 8 قىلمىستىق ءىس تەرگەۋگە الىندى. ونىڭ ىشىندە اتىراۋ قالاسىنداعى «دينامو» ستاديونىندا ۇستالعاندار مەن بولعان وقيعا، الماتى وبلىسىنىڭ پوليتسيا عيماراتىنداعى باتىربايەۆتىڭ، كامەلەت جاسقا تولماعان ەسبولات ۇلىنىڭ جانە باسقالارعا كۇش قولدانۋ تۋرالى ارىزدارى، سونداي-اق، وزگە دە قوعامدىق رەزونانس تۋدىرعان فاكتىلەر»، - دەدى ە. قيلىمجانوۆ.

ونىڭ ايتۋىنشا، ءاربىر قىلمىستىق ءىس باقىلاۋدا تۇر. ناقتى نۇسقاۋلار بەرىلدى. پروتسەس پروكۋرورلارى تاعايىندالدى.

بۇدان بۇرىن حابارلانعانداي، بيىلدىڭ 16- اقپانىنداعى جاعداي بويىنشا باس پروكۋراتۋرانىڭ، ىشكى ىستەر مينيسترلىگىنىڭ، ۇلتتىق قاۋىپسىزدىك كوميتەتىنىڭ جانە سىبايلاس جەمقورلىققا قارسى ءىس-قيمىل قىزمەتىنىڭ تەرگەلۋىندەگى بارلىق قىلمىستىق ىستەر بويىنشا 741 كۇدىكتى سوت سانكتسياسىمەن قاماۋدا.

سونىمەن قاتار، ەلدوس قيلىمجانوۆ ۇرلانعان قارۋدىڭ قاي بولىگى تابىلعانىن ايتتى.