ءبىر ايدا قىرعىزستان تاسىمالداۋشىلارى قازاقستان رەسپۋبليكاسى زاڭناماسىن 360 رەت بۇزعان

استانا. قازاقپارات - ق ر ي د م قىرعىزستان تاسىمالداۋشىلارى تاراپىنان جاسالعان زاڭ بۇزۋشىلىقتار تۋرالى حابارلادى.

ءبىر ايعا جۋىق ۋاقىتتا قىرعىزستان تاسىمالداۋشىلارى قازاقستان رەسپۋبليكاسى زاڭناماسىن 360 رەت بۇزعان.

بيىل قازان ايىنىڭ 10 ى مەن 30 ى ارالىعىندا ق ر ينۆەستيتسيالار جانە دامۋ مينيسترلىگى كولىك كوميتەتىنىڭ وكىلدەرى قىرعىز رەسپۋبليكاسى تاسىمالداۋشىلارى تاراپىنان جاسالعان 360 زاڭ بۇزۋشىلىقتى انىقتادى.

ەسەپتىك كەزەڭدە قىرعىز رەسپۋبليكاسىنىڭ 3054 اۆتوكولىك قۇرالى تەكسەرىلدى. تەكسەرىستەردىڭ ناتيجەسىندە تاسىمالداۋشىلارعا جالپى سوماسى 11,8 ميلليون تەڭگە كولەمىندە ايىپپۇل سالىندى. ەڭ ءجيى كەزدەسەتىن زاڭ بۇزۋشىلىق تەز بۇلىنەتىن جۇكتەردى تاسىمالداۋ سەرتيفيكاتىنىڭ بولماۋى.

مۇنداي زاڭ بۇزۋشىلىقتىڭ ۇلەسىندە 151 دەرەك بار نەمەسە 40 پايىزدى قۇرايدى. سونداي-اق، تاۋار- كولىك جۇك قۇجاتىنىڭ (CMR) بولماعانى ءۇشىن تاسىمالداۋشىلارعا 103 رەت ايىپپۇل سالىندى، سالماق جانە گاباريت پارامەترلەرىن ساقتاماعانى ءۇشىن 69 رەت، جولاۋشىلاردى تۇراقسىز تاسىمالداۋعا ارنالعان قازاقستاندىق رۇقسات بلانكىلەرىنىڭ بولماعانى ءۇشىن 13 رەت، كابوتاجدى تاسىمال جاساعانى ءۇشىن - 11 رەت، جۇكتەردى تاسىمالداۋ ەرەجەلەرىن بۇزعانى ءۇشىن 6 رەت، ءقاۋىپتى جۇكتەردى تاسىمالداۋ ەرەجەلەرىن بۇزعانى ءۇشىن 5 رەت جانە تاعى باسقا دا ايىپپۇلدار سالىندى.

 

Kaz.tengrinews.kz