فەيسبۋك قولدانۋشىلارى 360 گرادۋستىق سۋرەت تۇسىرە الادى
استانا. قازاقپارات - «فەيسبۋك» الەۋمەتتىك جەلىسىنىڭ ءموبيلدى قوسىمشاسىندا 360 گرادۋستىق سۋرەت ءتۇسىرۋ فۋنكسياسى پايدا بولدى.
بۇل تۋرالى TechCRunch حابارلادى.
جاڭا وپتسيانى قولدانۋ ءۇشىن قوسىمشانىڭ ىشىندە كامەرانى قوسىپ، مازىردە سايكەس ءبولىمدى تاڭداۋ قاجەت.
كولەمدى سۋرەتتەردى ءتۇسىرۋ ءۇشىن ارنايى مودۋل قاجەت ەمەس، تەك سمارتفوننىڭ كامەراسىن باعدارلامانىڭ نۇسقاۋلىعىنا سايكەستەندىرسەڭىز بولدى. كومپانيادا اتاپ وتكەندەي، جاڭا فۋنكسيا كومپيۋتەرلىك كورۋ مەن ماشينالىق وقۋ تەحنولوگياسى نەگىزىندە جۇمىس ىستەيدى.
«فەيسبۋك» جاڭارتىلعان قوسىمشانى بىرتە-بىرتە ەنگىزۋگە نيەتتى، الايدا تاياۋ ۋاقىتتا ونى Android پەن iOS ۇيالى قوسىمشالارىنىڭ بارلىق قولدانۋشىلارى الۋى ءتيىس.
