رۇستەم قايىرتاي ۇلى، ايتىسكەر اقىن: اباي مەن شاكارىمنىڭ 360 ولەڭىن جاتقا ءبىلدىم
بالالىق شاق دەگەندە، قولىما ىلعي كىتاپ ۇستاپ جۇرەتىنىم ەسكە تۇسەدى.
اسىرەسە، سايىن مۇراتبەكوۆتىڭ كىتاپتارىن جاتا-جاستانا وقيتىنمىن.
جازۋشى كەيىپكەرلەرىنىڭ كوبىسىنىڭ تاعدىرلارى قيىن. سوندا مەن «قانداي باقىتتى بالامىن» دەپ ويلايتىنمىن.
العاشقى قوڭىراۋىم مۇلدە ەسىمدە جوق. ويتكەنى، مەكتەپكە جاسىم 5 كە تولماي بارىپپىن. ساباقتا وتىرىپ ۇيىقتاپ كەتەدى ەكەم. ۇستازىم مەنى وياتۋ ءۇشىن ماعان تانىس سوزدەردى داۋىستاپ ايتاتىن كورىنەدى.
« - مىناۋ نە، بالالار؟ - ۋى- ى- ىق. ال، مىناۋ - كە- رە- گە» دەگەندە بارىپ ويانادى ەكەم. جايلاۋدا وسكەن بالامىن عوي. باسقا بالالار ءتارىزدى ويىنشىق، كاماز، تەلەديدار دەگەن نارسەلەرگە قىزىقپادىم. سەبەبى، مەكتەپكە دەيىن ونداي «وركەنيەتتى» بىلمەگەم.
اكەم 5 جاسىمنان باستاپ دومبىرا ۇيرەتتى.
اجەم ءانشى كىسى ەدى. اۋىلدىڭ تويى اجەمسىز وتپەيتىن. سول تويدىڭ بارىنە اجەمنىڭ جانتورسىعى سياقتى بىرگە باراتىنمىن. باسقا بالالار تويدان ءبىر-ەكى بارعان سوڭ جالىعادى عوي. ال مەن جالىقپايتىنمىن. ءالى كۇنگە سول كەزدەگى اجەلەردەن ەستىگەن اڭگىمە، ازىلدەر قۇلاعىمدا.
الدىما جان سالعاندى جاراتپايتىنمىن. 2-سىنىپتا «ونەر الدى - قىزىل ءتىل» دەگەن ماقال-ماتەلدەر سايىسىنا قاتىستىم. ناتيجەسىندە 2-ورىن الدىم. سوعان قاتتى نامىستانىپ، ۇيگە كەلىپ جىلاعانىم بار. كەيىن ءبىر ايتىستا ءۇشىنشى ورىن العانىما قاپالاندىم. قازىر سول بالالىعىما ەرىكسىز كۇلەم.
6-سىنىپتا العاش رەت عاشىق بولدىم. اينۇر مەنەن ءبىر سىنىپ كەيىن وقيتىن. عاشىقتىق ولەڭدەر جازا باستادىم. بالا ماحابباتىممەن Ⅲكۋرسقا دەيىن دوس بولدىق.
1998 - جىلى دارىندى بالالاردىڭ رەسپۋبليكالىق فورۋمى ءوتتى. 6-سىنىپتا وقىپ جۇرگەن كەزىم. فورۋمعا وبلىستىڭ اتىنان ءبىر ورىس قىز ەكەۋمىز باردىق. العاش رەت ۇشاققا وتىردىم. الماتىعا كەلگەنشە قاسىمداعى قىزعا ورىسشا ءتىل قاتا الماي كەلدىم. الماتىدا 20 كۇن قىدىردىق. «تاۋ شاپاعى» دەگەن لاگەردە بولدىق. قازىرگى «ءازىل الەمىنىڭ» ءارتىسى باقىتجان قاسىموۆ دەگەن جىگىت تە قاتىسىپ ەدى. سوسىن ءبىزدى استاناعا اپاردى. ول جەردە ەلباسىمەن كەزدەستىك. ءبىر داستارحاندا وتىردىق. نۇرسۇلتان اعامىز بىزگە دومبىرامەن ءان ايتتى.
ال مەن ءوز كەزەگىمدە ەلباسىنا ارناۋ ايتىپ بەردىم. نۇرسۇلتان اعامىز ەستەلىككە ءبىر-ءبىر ساعاتتان سىيلادى.
8-سىنىپتا العاش رەت اباي-شاكارىم وقۋلارىنا قاتىستىم. رەسپۋبليكانىڭ ءار تۇكپىرىنەن ەڭ مىقتى دەگەندەرى جينالعان. سايىس الدىندا بالالاردان «قانشا ولەڭ بىلەسىڭ؟» دەپ سۇرادىم. بىرەۋى «!25» دەپ ماقتاندى. تاعى ءبىر بالا «100 ولەڭىن بىلەم» دەپ، ەشكىمدى مەنسىنبەيتىن سىڭاي تانىتتى. ال مەن 360 ولەڭىن، قارا سوزدەرى مەن پوەمالارىن جاتقا وقيتىنمىن. ءسويتىپ، قاتارىنان ءۇش جىل بويى اباي-شاكارىم وقۋلارىنىڭ جەڭىمپازى بولدىم.
قادىر مىرزا ءالى اعامىزدى كۋمير تۇتتىم. ءالى كۇنگە ايتىستاردا قادىر اعامىزدىڭ ولەڭ جۇيەسىن قولدانامىن.
2002 - جىلى العاش رەت ءجۇرسىن ەرمان اعامىز جۇرگىزەتىن ايتىسقا قاتىستىم. 11-سىنىپ وقۋشىسىمىن. الماتى قالاسىندا ناۋرىز مەيرامىنا ارنالعان ايتىس ەدى. ايتاقىن بۇلعاقوۆ، ورازالى دوسبوسىنوۆ، ءاسيا بەركەنوۆا، اينۇر تۇرسىنبايەۆا، بالعىنبەك يماشيەۆ سىندى كىل مىقتىلار. مۇحامەدجان مەن بەكارىس اعالارىمىزدان باسقاسى تەگىس كەلدى. بارلىعى 24 اقىن باق سىنادى. مەن سوندا ەكىنشى اينالىمدا رينات زايىتوۆتى، ءۇشىنشى اينالىمدا داۋلەتكەرەي كاپ ۇلىن جەڭدىم. سوڭىندا امانجول التايەۆ اعامىزبەن تەڭ ءتۇستىم. ءسويتىپ، امانجول اعا ەكەۋمىز ءبىر-ءبىر كولىك ءمىنىپ قايتقانبىز.
دايىنداعان: قارلىعاش دوسانوۆا
«ۇلان»
