استانا اكىمدىگى قالا تۇرعىندارىنا ەسكەرتۋ جاسادى: 35 گرادۋس اياز، كوكتايعاق

None
استانا. قازاقپارات - استانادا اپتانىڭ العاشقى كۇنى سارشۇناق اياز ورناپ، جەر كوكتايعاق مۇزعا اينالدى. الداعى كۇندەرى كۇن سۋىتىپ، اۋا تەمپەراتۋراسى 30 گرادۋستان تومەن تۇسەدى، دەپ حابارلايدى قازاقپارات اكىمدىككە سىلتەمە جاساپ.

قالا تۇرعىندارى مەن قوناقتارى جاراقات الۋ، ۇسىك شالۋ سەكىلدى جاعدايلارعا ۇشىراماس ءۇشىن قاۋىپسىزدىك شارالارىن قاتاڭ ساقتاعانى جانە دالادا ۇزاق ۋاقىت بولماعانى ءجون.

استانادا بۇل كۇندەرى قاتتى كوكتايعاق بولىپ تۇر. ال قالانىڭ جولدارى مەن كوشەلەرىنە ۇنەمى قۇم- تۇز قوسپاسى سەبىلىپ تۇرادى.

ەلوردا تۇرعىندارى مەن قوناقتارى تايعاناپ قۇلاپ، جاراقات الماس ءۇشىن قاۋىپسىزدىك شارالارىن ساقتاۋى كەرەك.

اۆتوكولىكتى باسقارۋ كەزىندە جىلدامدىق رەجيمى مەن قاشىقتىقتى قاتاڭ ساقتاۋ ماڭىزدى.

سول سياقتى «قازگيدرومەت» ر م ك سينوپتيكتەرى الداعى كۇندەرى كۇن رايى قاتتى سۋىتاتىنىن حابارلادى.

سونىمەن، 9 -قاڭتاردا قالادا كوكتايعاق بولىپ، سولتۇستىك- باتىستان، باتىستان 9-14 م/س جەل سوعادى، ال تۇندە ەكپىنى 15-20 م/س جەتەدى.

اۋا تەمپەراتۋراسى تۇندە جانە كۇندىز - 24-26 گرادۋس اياز.

10- قاڭتاردا جاۋىن- شاشىنسىز اۋا رايى كۇتىلەدى. سولتۇستىك- باتىستان جەل 3-8 م/س جىلدامدىقپەن سوعادى. اۋا تەمپەراتۋراسى 30-32 گرادۋس ايازعا دەيىن تومەندەيدى.

11- قاڭتاردا ازداعان قار جاۋادى دەپ بولجانىپ وتىر. تۇندە اۋا تەمپەراتۋراسى 33-35، ال كۇندىز 25-27 ايازعا دەيىن تومەندەيدى.

ەلوردانىڭ كوممۋنالدىق قىزمەتتەرى تاۋلىك بويى كۇشەيتىلگەن رەجيمدە جۇمىس ىستەپ جاتىر، قار كۇرەۋ جۇمىسى توقتاۋسىز جۇرگىزىلۋدە.

ەلوردادا 9- قاڭتار كۇنى تاڭەرتەڭ قار كۇرەۋ جۇمىسىنا ەكى مىڭنان استام جول جۇمىسشىسى شىقتى، 1,5 مىڭعا جۋىق ارنايى تەحنيكا جۇمىلدىرىلدى.

وتكەن تۇندە، ياعني 8- قاڭتاردان 9-ىنا قاراعان ءتۇنى قالادان 39 مىڭ تەكشە مەتردەن اسا قار شىعارىلدى، بۇل 2349 اۋىر جۇك كولەمىنە تەڭ.

قىس مەزگىلىنىڭ باسىنان بەرى قار پوليگوندارىنا بارلىعى 1,7 ميلليون تەكشە مەتردەن استام قار مەن مۇز شىعارىلدى.

رەداكتور

جانات قاپالبايەۆا

سوڭعى جاڭالىقتار