07:55, 28 - شىلدە 2020 | GMT +5
اتىراۋدا جانساقتاۋ بولىمىندە كوروناۆيرۋسپەن اۋىرعان 35 ناۋقاس جاتىر
اتىراۋ. قازاقپارات - اتىراۋ وبلىسىندا جانساقتاۋ بولىمىندە كوروناۆيرۋسپەن اۋىرعان 35 ناۋقاس جاتىر، دەپ حابارلايدى قازاقپارات.
وبلىستىق دەنساۋلىق ساقتاۋ باسقارماسىنىڭ باسشىسى نۇرلىبەك قابدىقاپاروۆتىڭ مالىمەتىنشە، وتكەن تاۋلىكتە اتىراۋ وبلىسىندا كوروناۆيرۋس ينفەكتسياسىن جۇقتىرعان 37 ناۋقاس تىركەلگەن.
«بۇل - كارانتين جاعدايىنداعى تومەنگى ستاتيستيكا. قازىر ينفەكتسيالىق ستاتسيونارلاردا 721 ناۋقاس، پروۆيزورلىق ستاتسيونارلاردا 368 ناۋقاس ەم قابىلداۋدا. جانساقتاۋ بولىمىندە 35 ادام ەمدەلىپ جاتىر. قاۋىپتى ىندەتتەن 18 ادام قايتىس بولدى»، - دەدى نۇرلىبەك قابدىقاپاروۆ.
ونىڭ ايتۋىنشا، اتىراۋ وبلىسىندا 1170 ورىندىق ينفەكتسيالىق ستاتسيونار، 787 پروۆيزورلىق ستاتسيونار بار.
ەسكە سالا كەتەلىك، اتىراۋ وبلىسىندا كارانتين 3- تامىزعا دەيىن سوزدىرىلعان بولاتىن.
