ۆەنەسۋەلادا نارازىلىق شەرۋلەرى كەزىندە قازا بولعاندار سانى 35 كە جەتتى
بۇل ەسەپكە ەكى تاراپتان دا اجال قۇشقاندار الىندى. ەكدەر لۋگو ەسىمدى شەرۋشىنى ۆالەنسيادا پوليتسيامەن قاقتىعىس كەزىندە ساقشىلار اتىپ تاستاعان.
بۇل تۋرالى قالا مەرى ەنزو سكارانو تۆيتتەردەگى پاراقشاسىندا حابارلاعان ەدى. ال رەيتەر اگەنتتىگىنىڭ ەسەبى بويىنشا، قازا تاپقاندار سانى 37 ادامعا جەتسە، فرانس پرەسس اگەنتىگى 36 ادام قازا بولدى دەپ سانايدى.
جالپى، قاقتىعىس كەزىندە 717 ادام جاراقات العان. تۇتقىندالعان بىرنەشە ءجۇز ادامنان قازىر تەك 152 ءسى تۇرمەدە وتىر. قالعاندارى شىعارىلعان.
ەسكە سالا كەتەيىك، بيىل ءساۋىر ايىنىڭ باسىنان بەرى ەلدە ۇكىمەتكە قارسى شەرۋلەر بولىپ كەلەدى. نارازىلىق كەي-كەيدە قاندى قاقتىعىسقا ۇلاسىپ كەتىپ تۇر. وپپوزيتسيا وكىلدەرى ەل پرەزيدەنتى نيكولاس مادۋرونىڭ قازىرگى ۇلتتىق اسسامبلەيانى تاراتىپ، كونستيتۋتسياعا وزگەرىس ەنگىزۋ وكىلەتتىگى بەرىلەتىن جاڭا پارلامەنت قۇرۋ تۋرالى شەشىمىنە قارسىلىق بىلدىرىپ كەلەدى.
