استانادا اشىلاتىن جاڭا تەمىرجول ۆوكزالى تاۋلىگىنە 35 مىڭ جولاۋشى قابىلدايدى
بۇل تۋرالى «قازاقستان تەمىر جولى» كومپانياسىنىڭ وكىلدەرى حابارلاپ وتىر.
زاماناۋي كەشەننىڭ سىيىمدىلىعى ەسكى ۆوكزالمەن سالىستىرعاندا 3 ەسە ارتىق. زاماناۋي عيماراتتىڭ اۋماعى 27 مىڭ شارشى مەتر. مۇنداي كەشەن ەلىمىزدە بۇرىن-سوڭدى بولعان ەمەس. ادەتتەگىدەي پويىزدار ۆوكزالدىڭ سىرتىنا ەمەس، ىشىنە توقتايدى. ول ءۇشىن 3 قاباتتى ءۇيدىڭ بيىكتىگى شاماسىندا ارنايى كونكورستار سالىنىپ جاتىر. وعان باسپالداق نەمەسە جەدەلساتى ارقىلى كوتەرىلۋگە بولادى. مىڭجىلدىقتار اللەياسىنىڭ جانىنان سالىنىپ جاتقان عيماراتتىڭ جوباسى جاقىندا عانا فرانسيا ەلىندە وتكەن بەدەلدى بايقاۋدىڭ جەڭىمپازى اتاندى.
«بۇل قۇرىلىستىڭ ەسكيزدىك جوباسى قالالىق كەڭەستە شەشىلگەن. «ق ت ج» استانا ارحيتەكتۋراسى جانە قالا اكىمدىگىمەن كەلىسىلگەن. قازىرگى كەزدە توبەسىن جابۋ جۇمىستارى ءجۇرىپ جاتىر. سونداي-اق سىرتى قاپتالىپ جاتىر. كەشەنگە قاتىنايتىن بىرنەشە ەستاكادالار قۇرىلىسى ءجۇرىپ جاتىر. جولاۋشىلار ءۇشىن دە ۆوكزالعا جەتۋدىڭ قولايلى جولدارى قاراستىرىلعان. مۇندا جەكە جانە قوعامدىق كولىكپەن وڭاي كەلۋگە بولادى. تەمىر تۇلپارلار ءۇشىن 1181 ورىن بار. ولاردىڭ 740 ى عيماراتتىڭ ىشىندە، قالعانى سىرتىندا»، - دەيدى «ق ت ج» ۇ ك» ا ق كۇردەلى جوبالاردى جۇزەگە اسىرۋ ءبولىمىنىڭ باسشىسى باعزات راحىمجانوۆ.
«پلاتفورمالار مەن ەستاكادالاردىڭ ۇزىندىعى 600 مەتردى قۇرايدى. پويىزدار جۇرەتىن اۋماقتىڭ استىنداعى 2- قاباتتا كولىك قوياتىن ورىندار ورنالاسادى. پويىزدار قاتىنايتىن پلاتفورمالاردىڭ اۋماعى 59 شارشى مەتر. ال جابىق ورىنداردىڭ اۋماعى 130 مىڭ شارشى مەتر. بيلەت كاسسالارى ءبىرىنشى جانە ءتورتىنشى قاباتتاردا ورنالاسادى. جولاۋشىلارعا ىڭعايلى بولۋ ءۇشىن ۆوكزالدىڭ ىشىندە مەيرامحانالار، قوناقۇيلەر، انا مەن بالا بولمەسى، مەديتسينالىق بەكەت بولادى»، - دەيدى سەمبول» ا ق ديرەكتورىنىڭ كۇردەلى قۇرىلىس جونىندەگى ورىنباسارى سۇلەيمان يىلماز.
بۇگىنگى تاڭدا قولدانىستاعى ۆوكزال جىلىنا 4 جارىم ميلليون جولاۋشىعا لايىقتالعان، دەپ جازدى 24.kz. ال جاڭا كەشەن 12 ميلليون ادام قابىلداي الادى. ول اشىلعاننان كەيىن مۇندا 1 مىڭنان استام ادام جۇمىسپەن قامتىلادى. مامانداردىڭ ايتۋىنشا، قازىر قۇرىلىس جوسپارعا ساي ءجۇرىپ جاتىر. كەشەن قولدانىسقا 2017-جىلدىڭ كوكتەمىندە بەرىلۋى ءتيىس.
